Qaraǵandy oblysynda eki aýdan men bir qalaǵa ákim saılandy
Qaraǵandy oblysynda pılottyq saılaý barysynda Aqtoǵaı aýdanynyń ákimin halyq tańdady. Aýdan boıynsha úsh úmitker usynyldy. Rýslan Kenjebekov basym daýyspen jeńiske jetti, dep habarlaıdy Kazinform.
Qazaqstan boıynsha pılottyq saılaýǵa engizilgen 42 aýdannyń qatarynda Qaraǵandy oblysynyń Aqtoǵaı aýdany boldy.
Aýdan boıynsha saılaýǵa 39 saılaý komıssııasy, onyń ishinde 1 aýmaqtyq jáne 38 ýchaskelik saılaý komıssııalary jumyldyryldy. Olardyń quramynda saılaý kúni, 5 qarashada komıssııanyń 213 múshesi jumys istedi. Aqtoǵaı aýdanynda barlyǵy 2 kent, 1 aýyl, 13 aýyldyq okrýg, barlyǵy 35 eldi meken bar. Aýdan turǵyndarynyń sany – 15 692 adam. Onyń ishinde 10 475 saılaýshy bar.
Aıta ketý kerek, Aqtoǵaı aýdanynyń turǵyndary saılaýda aıtarlyqtaı belsendilik tanytty. Daýys berýge shamamen 75% saılaýshy qatysty.
Búgin Qaraǵandy oblystyq saılaý komıssııasynda saılaý qorytyndysy jarııalandy.
Aýdan ákimi laýazymyna 3 kandıdat usynyldy. Qorytyndysy boıynsha Nurlanbek Jańabergenov úshin 695 saılaýshy daýysy, Rýslan Kenjebekov úshin 5656 daýys, Nurjan Seıitov úshin 1251 daýys berdi. «Barlyǵyna qarsy» belgisi bar bıýlletender sany - 103.
Esep boıynsha Rýslan Aıtykenuly Kenjebekov kósh bastady. Jańadan saılanǵan ákim 1978 jyly osy aýdanda Qyzylaraı aýylynda dúnıege kelgen.
E.Bóketov atyndaǵy Qaraǵandy memlekettik ýnıversıtetin, «Bolashaq» Qaraǵandy ýnıversıteti jáne QR Joǵarǵy Soty Janyndaǵy Sot tóreligi akademııasyn bitirgen.
Eńbek jolyn 2000 jyly Astana qalasynda L.Gýmılev atyndaǵy Eýrazııa ýnıversıtetiniń qylmystyq quqyq jáne protsess kafedrasynyń oqytýshysy bolyp bastaǵan. Ár jyldary Qaraǵandy oblysynyń Ádilet departamentinde, Qaraǵandy qalasy básekelestikti qorǵaý agenttiginiń Qaraǵandy oblysy boıynsha monopolııaǵa qarsy ınspektsııasynda, Ulttyq ekonomıka mınıstrligi Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamentinde jumys istegen.
2023 jyldyń qańtar aıynan bastap búgingi kúnge deıin Aqtoǵaı aýdanynyń ákimi qyzmetin atqardy.
Qaraǵandy oblysynyń Osakarov aýdanynda pılottyq saılaý ótti. Turǵyndardyń kópshiligi Rýslan Nurmuhanbetovke daýys berdi.
Osakarov aýdany – Qaraǵandy oblysy boıynsha pılottyq saılaý jobasyna engen aýdandardyń biri. 21 myńnan astam halqy bar aýdanda 5 qarashadaǵy saılaýǵa 41 saılaý ýchaskesi tartyldy.
Saılaý kúni 14 myńnan astam bıýlleten berildi. Saılaýshylardyń kelýi shamamen 70%.
Aýdan ákimi laýazymyna úsh úmitker boldy. Onyń ishinde 11 595 daýysty Rýslan Nurmuhanbetov jınady. Ekinshi kandıdat Ermek Dónenbaev úshin saılaýshylar 1276 daýys berdi, al Násip Shalabaeva úshin 1391 daýys berildi. «Barlyǵyna qarsy» belgisi bar bıýlletender sany – 103.
Osylaısha, Osakarov aýdanynyń basshysy Rýslan Nurmuhanbetov boldy.
Ol 1982 jyly Qostanaı oblysynda, Rýdnyı qalasynda dúnıege kelgen. Eki joǵary bilimi bar. E.Bóketov atyndaǵy Qaraǵandy memlekettik ýnıversıtetin jáne Qaztutynýodaǵy Qaraǵandy ekonomıkalyq ýnıversıtetin bitirgen.
Eńbek jolyn 2005 jyly Osakarov aýdany Molodejnyı kenti ákiminiń apparatynda bastaǵan. Ár jyldary Osakarov jáne Buqar Jyraý aýdandary ákiminiń apparattarynda qyzmet atqardy. 2022 jyldyń qyrkúıeginen bastap búgingi kúnge deıin Osakarov aýdany ákiminiń mindetin atqardy.
Qaraǵandy oblysynyń Prıozersk qalasynda pılottyq saılaý ótti. Jergilikti halyq qala basshysy retinde Mansur Ahmetovti tańdady.
Prıozersk aýdandar men oblystyq mańyzy bar qalalar ákimderin saılaý jónindegi pılottyq jobaǵa kirgen úsh qalanyń biri boldy.
Qalada saılaý kúni, 5 qarashada 11 saılaý ýchaskesi jumys istedi. Tizimge engizilgen 6 myńnan astam saılaýshynyń 55% - dan astamy daýys berýge keldi.
Qala ákimi laýazymyna úsh úmitker boldy. Onyń ishinde Mansur Ahmetov eń kóp daýys jınady. Ol úshin 2664 saılaýshy óz daýystaryn berdi. Rýslan Koıshınge 340 daýys berildi. Úshinshi kandıdat Svetlana Popchenko 477 daýys jınady. «Barlyǵyna qarsy» belgisi bar bıýlletender sany – 19.
Prıozersk qalasynyń jańadan saılanǵan ákimi Mansur Ahmetov 1987 jyly Aqmola oblysynyń Şýchınsk qalasynda dúnıege kelgen. Eki joǵary bilimi bar. L.Gýmılev atyndaǵy Eýrazııa ulttyq ýnıversıtetin jáne «Femıda» zań akademııasyn támamdaǵan.
Eńbek jolyn 2010 jyly týǵan qalasynda jeke kompanııada bastaǵan. Sol jyly Aqmola oblysy «Shortandy aýdany boıynsha salyq basqarmasy» MM salyqtyq ákimshilendirý bóliminiń bas mamanynyń m.a. boldy. Ár jyldary Astana, Şýchınsk qalalary men Shortandy aýdanynyń salyq basqarmalarynda jumys istedi. Prıozersk qalasyndaǵy «Balqash» emdeý-saýyqtyrý kesheniniń dırektory boldy.
2023 jyldyń tamyz aıynan bastap búgingi kúnge deıin Prıozersk qalasy ákiminiń orynbasary qyzmetin atqardy.
