Qaraǵandy oblysynda daýyldy eskertý saqtalady
Aýa-raıynyń jaqsarýyna baılanysty avtojoldardyń 13 ýchaskesinde, onyń ishinde Respýblıkalyq mańyzy bar avtojoldardyń 7 ýchaskesinde jáne oblystyq mańyzy bar avtojoldardyń 6 ýchaskesinde qozǵalys ashyldy, dep habarlaıdy Kazinform.
Tótenshe jaǵdaı mınıstrliginiń málimetinshe, avtojoldardyń 9 ýchaskesinde, onyń ishinde Respýblıkalyq mańyzy bar avtojoldardyń 4 ýchaskesinde jáne oblystyq mańyzy bar avtojoldardyń 5 ýchaskesinde avtokóliktiń barlyq túri úshin qozǵalys jabyq kúıinde qalyp otyr.
Avtojoldardyń jabyq ýchaskelerinde barlyǵy 142 adam jáne 66 tehnıka jumyldyryldy.
Sońǵy táýlikte TJD, QR TJM 52859, polıtsııa departamenti jáne jol uıymdary kúshterimen 76 adam qutqaryldy, onyń ishinde 7 bala, 237 adam evakýatsııalandy, onyń ishinde 34 bala, qar qursaýynan 15 avtomobıl shyǵaryldy, sondaı-aq 10 avarııalyq-qutqarý 4 izdestirý-qutqarý jumystary júrgizildi.
Jergilikti atqarýshy organdar 6 jylytý pýnktinde 191 adamdy ornalastyrdy, onyń ishinde - 14 bala.
Abaı aýdanynda izdestirý-qutqarý jumystary jalǵasýda, Aqbastaý aýyly Jánibek qystaýy, 11 qańtar saǵat 04-00-den bastap TJD kúshterimen 10 qańtar saǵat 12-00-de mal izdeýge attanǵan 2 shopan izdestirilip jatyr.
Tótenshe jaǵdaılar departamenti oblystyń barlyq turǵynyna eskertedi!
Qaýipsizdik erejelerin qatań saqtańyz:
- Eldi mekenderden tys jerlerge shyqpaýdy!
- Jabylý oryndarynda kólik quraldarynyń keptelisin jasamaýdy!
- Jol boıyndaǵy obektiler men eldi mekenderde qalýdy suraımyz!
Aýa raıy jaǵdaılary týraly aqparatty Tótenshe jaǵdaılar departamentiniń resmı betterinde jáne áleýmettik jelilerde qadaǵalańyzdar!
Barlyq oqıǵa men tótenshe jaǵdaı týraly 112 nemese (8-7212) 43-36-36, 43-37-37 telefonyna habarlasyńyz!
