Qaraǵandy oblysynda brakonerler ustaldy
QARAǴANDY. KAZINFORM — Qaraǵandy oblysynyń Nura aýdanynda tabıǵatty qorǵaý, krımınaldyq jáne patrýldik polıtsııa qyzmetkerleri birlesip ótkizgen «Mal urysy» jedel-profılaktıkalyq is-sharasy barysynda brakonerler ustaldy, dep habarlaıdy Polisia.kz.
Oqıǵa Temirtaý — Astana avtojolynyń 50-shaqyrymynda Alǵabas aýylynyń mańynda bolǵan.
Polıtsııanyń jyljymaly toby kúdik týdyrǵan Mitsubishi Pajero avtokóligin toqtatpaq bolǵan kezde, júrgizýshi men jolaýshy polıtseılerdiń talabyna baǵynbaı, jol jıegine burylyp qashpaq bolǵan. Alaıda tártip saqshylarynyń jedel ári úılesimdi is-qımylynyń arqasynda kólik toqtatylyp, eki er adam ustaldy.
Tekserý barysynda kóliktiń júk salǵyshynan jabaıy ańnyń eti, eki ańshy myltyǵy, 15 oq-dári, qoldan jasalǵan pyshaq jáne qýatty jaryq sham tabyldy.
Ustalǵandardyń eshqaısysynda ań aýlaýǵa ruqsat beretin qujattar bolmaǵan. Kúdiktiler — Saran qalasynyń 41 jastaǵy eki turǵyny. Atalǵan derek boıynsha sotqa deıingi tergeý bastaldy.
Sonymen qatar Nura aýdandyq sotynyń qaýlysymen kúdiktiler polıtsııa qyzmetkerleriniń zańdy talabyna baǵynbaǵany úshin kináli dep tanyldy.
Buǵan deıin Batys Qazaqstan oblysynda qaban aýlaǵan brakoner ustaldy.