Qaraǵandy oblysynda boranda dalada qalǵan 7 adam qutqaryldy

ASTANA. KAZINFORM - Qaraǵandy oblysynda Tótenshe jaǵdaılar departamentiniń qyzmetkerleri qar qursaýynan 7 adamdy qutqardy, dep habarlaıdy QR Tótenshe jaǵdaılar mınıstrliginiń baspasóz qyzmeti.

Tańerteń Osakarovka aýdanynda Stepnoe aýylynan 10 shaqyrym jerde jeńil avtokólik qar qursaýynda qalyp qoıǵan.

Qutqarýshylar dereý oqıǵa ornyna jetip, kólik ishindegi 7 adamdy, onyń 5-i balany qar qursaýynan shyǵardy. Olarǵa medıtsınalyq kómek qajet bolmady. Azamattar jaqyn mańdaǵy eldi mekenge jetkizildi.

TJM qaýipsizdik erejelerin qatań saqtaýǵa shaqyrady. Aýa raıynyń ózgerýin, joldardaǵy qozǵalystyń shektelýin qadaǵalaýdy suraıdy.

Aıta keteıik, ótken táýlikte Aqtóbe oblysynda kúnniń buzylýyna baılanysty TJD bólimsheleri 23 ret jolǵa shyǵyp, oǵan 200-ge jýyq qyzmetker men 40-tan astam tehnıka tartyldy. Nátıjesinde 6 adam qutqaryldy, onyń ishinde 2 bala, 5 adam, onyń ishinde 1 bala evakýatsııalandy. 42 adam qaýipsiz jerge jetkizildi.

«Kúnniń buzylýyna baılanysty Tótenshe jaǵdaılar departamentinde jedel shtab qurylyp, jumys atqarýda»,-delingen habarlamada.

Pavlodarda kúshti jel saldarynan ústine aǵash qulaǵan áıel jan tapsyrǵany týraly jazdyq.