Qaraǵandy oblysynda 10 jaıly mektep salynýda
ASTANA. Kazinform - Qaraǵandy oblysynda «Jaıly mektep» ulttyq jobasy boıynsha 18 nysan josparlanǵan. Qazir onynda qurylys júrgizilýde. Olar qalalar men aýdandardaǵy oqýshy oryndarynyń tapshylyǵyn joıýǵa múmkindik beredi, dep habarlaıdy óńir ákimdiginiń baspasóz qyzmeti.
Oblys ákimi Ermaǵanbet Bólekpaev Qaraǵandydaǵy jumystardyń barysyn tekserdi.
Kógildir toǵandar shaǵyn aýdanynda 1200 oryndyq jaıly mektep, Kendala shaǵyn aýdanynda – eki myń oryndyq mektep salynýda.
Gúlderde salynatyn jańa oqý orny 300 orynǵa eseptelgen. Oqý ordasy ashylǵannan keıin kórshiles ornalasqan Y. Altynsarın atyndaǵy mektep-lıtseıdegi júkteme tómendeıdi.
Qurylys-montaj jumystary belsendi júrgizilýde. Materıaldarǵa qatysty problemalar joq. Otandyq taýar óndirýshilerdiń ónimderi paıdalanylyp jatyr.
Jaıly mektepterde qaraǵandylyq ónimder de bar: beton, armatýra, eden plıtalary, oqshaýlaý jáne t. b.
Sonymen qatar jıhaz, oqý jabdyqtaryn satyp alý júrip jatyr. Barlyǵy eń zamanaýı bolýy kerek. Ár mektepte STEM-zerthanalar, robototehnıka kabınetteri, sport jáne trenajer zaldary, kovorkıngter jabdyqtalady. Múgedektigi bar balalar úshin kedergisiz orta qurylýy qajet.
Qalada da, aýylda da jaıly mektepter biryńǵaı standarttar boıynsha salynyp jatyr. Bastaýysh jáne joǵary synyp oqýshylary jeke kireberisi bar mektep ǵımaratynyń ártúrli bloktarynda oqıdy.
Ermaǵanbet Bólekpaev jumystar turaqty baqylaýda bolatynyn atap ótti.
