Qaraǵandy 2028 jyly TMD-nyń jastar astanasy atanady
ASTANA. KAZINFORM — Qaraǵandy qalasy 2028 jylǵy TMD-nyń jastar astanasy bolyp jarııalandy, dep Qaraǵandy oblysynyń ákimi Ermaǵambet Bólekbaev habarlady.
— TMD Úkimet basshylary keńesiniń bul sheshimi — Qazaqstannyń halyqaralyq gýmanıtarlyq yntymaqtastyqty damytýdaǵy bedeline berilgen joǵary baǵa ári Memleket basshysynyń bastamasymen júzege asyrylyp kele jatqan jastardy qoldaýǵa baǵyttalǵan júıeli memlekettik saıasattyń naqty nátıjesi. Bul — Qaraǵandy oblysy úshin úlken mártebe ári óńirimizdiń áleýetine kórsetilgen zor senim, — delingen ákimniń jazbasynda.
Qaraǵandy oblysy ákiminiń málimdeýinshe, búginde oblysta 303 myńnan astam jastar ómir súredi.
— Olar — bilimge umtylǵan, el damýyna beı-jaı qaramaıtyn, bastamashyl ári talantty jastar. Dál osy býyn eriktiler qozǵalysyn, ǵylym men bilimdi, kásipkerlik pen qoǵamdyq bastamalardy jańa deńgeıge kóterip keledi. TMD-nyń Jastar astanasy mártebesi Qaraǵandy úshin halyqaralyq jastar yntymaqtastyǵyn keńeıtýge, tájirıbe almasýǵa jáne aýqymdy jobalardy júzege asyrýǵa jańa múmkindik beredi, — delingen habarlamada.
Ákim bul jaýapty mindetti abyroımen atqaryp, halyqaralyq deńgeıdegi jobany joǵary dárejede uıymdastyratynyna senim bildirdi.
— Barsha Qaraǵandy oblysynyń turǵyndaryn jáne Qazaqstan jastaryn osy aıtýly jańalyqpen shyn júrekten quttyqtaımyn! Elimizdiń bolashaǵy — jas urpaqtyń bilimi men jigerinde, qajyry men jasampazdyq rýhynda, — dedi ol.
Eske sala keteıik, buǵan deıin Qaraǵandy oblysynda quny 42,5 mlrd teńge bolatyn farmatsevtıkalyq zaýyt salynatynyn jazdyq.
