«Qar astynda nege qalady?» - baspasózge sholý
***
«Egemen Qazaqstan» gazetiniń búgingi sanynda «Jumys birlese atqarǵanda tıimdi» degen materıal berildi. Elbasy Nursultan Nazarbaev Bas prokýror Ashat Daýylbaev pen Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarovty qabyldady.
Memleket basshysy «Nur Otan» partııasy Saıası keńesiniń keńeıtilgen otyrysynda qabyldanǵan Sybaılas jemqorlyqqa qarsy is-qımyldyń 2015-2025 jyldarǵa arnalǵan partııalyq baǵdarlamasy aıasyndaǵy jumysty kúsheıtýdiń mańyzdylyǵyna toqtaldy.
- Ótken jyldar ishinde elimizde paraqorlyqtyń tamyryn joıý turǵysynan alǵanda biraz jumys atqaryldy. Atap aıtqanda, zańǵa ózgerister engizý, sheneýnikter men kásipkerler arasyndaǵy baılanysty azaıtý arqyly sybaılas jemqorlyqpen kúres jumystary qataıdy. Laýazymy men eńbegine qaramastan, barlyǵyn da jaýapqa tartatyn zań qoldanysqa endi. Jalpy, bul baǵytta belsendi jumys júrgizilýde, onyń nátıjesi kórinip turǵandyqtan, qoǵam tarapynan oń baǵa berilip otyr, - dedi Qazaqstan Prezıdenti.
«Egemen Qazaqstan» gazetinde «Taý teńseltken tolaǵaılar» degen kólemdi maqala kópshilik nazaryna usynylyp otyr. Qarashanyń 16-sy, jeksenbi kúni Almatydaǵy Balýan Sholaq atyndaǵy sport saraıynda aýyr atletıkadan erlerdiń 81-shi, áıelderdiń 24-shi álem chempıonattary úlken abyroımen márege jetti. Jer sharynyń 78 elinen kelgen 538 atlettiń qatysýymen ótken jahandyq jarysta álemniń 15 rekordy jańardy. Olardyń 11-i eresekter arasynda jasaldy. Osy toǵyz kún boıyna sport saraıy kórermenderge lyq toly boldy.
Qazaqstan quramasy birinshilikte 3 altyn, 2 kúmis medal jeńip alyp, komandalyq esepte 3-orynǵa ornalasyp, óziniń aldyna qoıǵan maqsatyn tolyq oryndap shyqty. Onda Zúlfııa Chınshanlo, Jasulan Qydyrbaev, Ilıa Ilın syndy sańlaqtarymyz altyn júldeger atansa, Jazıra Japparqul jáne Vladımır Sedov sekildi atletterimiz kúmis medalǵa qol jetkizdi. Bul Qazaqstan quramasynyń 2016 jyly Rıode-Janeıroda ótetin Olımpııalyq oıyndar úshin qajetti upaı qorynyń irgesin qalaýyna negiz boldy.
***
«Aıqyn» gazetiniń jazýynsha, Qazaqstanda mol astyq jınalsa, ol apatqa teńesedi: janar-jaǵarmaıdyń ýaqtyly jetkizilmeýi nátıjesinde, qyrmanǵa der kezinde oraq túspeı, egin jınalmaı, qar astynda qalady. Al jınalǵanynyń óziniń bir bóligi elevatorlar men saqtaý oryndarynyń jetispeýi kesirinen dalada shirıdi. Keshe Májiliste ótken «Úkimet saǵatynda» palata tóraǵasynyń orynbasary, «Nur Otan» partııasy fraktsııasynyń basshysy Darıǵa Nazarbaeva osyny ashyq aıtty. Bul jıynda qalaýlylar aldynda Aýyl sharýashylyǵy mınıstri Asyljan Mamytbekov esep bergen bolatyn. Onyń pikirinshe, Eýrazııalyq odaqtyń qurylýy, DSU-ǵa kirý qarsańynda otandyq agroóndirýshiler básekege qabilettilik deńgeılerin kóterý jaıyn qarastyrýlary kerek.
- Qazirgi kezeńde memlekettiń retteýshi jáne qoldaýshy róli óte mańyzdy, - dedi buǵan jaýap retinde D.Nazarbaeva. - Jeke sektor sharýashylyqpen ózi aınalysýǵa tıis, biraq bul úshin memleket oǵan qajetti bastapqy sharttardy jasaǵany jón. Oǵan memlekettik qoldaý sharalaryn jáne quraldaryn túsindirý, tipti seriktes tabýda kómek kórsetý kerek. Óıtkeni osyndaı tanystyqtar ornaıtyn halyqaralyq konferentsııalarǵa saparlap júrýge aýyl sharýashylyǵy ónimderin óndirýshilerdiń barlyǵynda birdeı múmkindigi bola bermeıdi. Onyń ústine eńbek adamdarynyń kóbi shet tilderin bilmeıdi.
Degenmen, D.Nursultanqyzy mınıstrge de aıaýshylyq bildirdi: «Aýyl sharýashylyǵy óndirisin ártaraptandyrý baǵytyndaǵy jumystardyń shaǵyn bolsa da, nátıjesi bar ekendigin aıta ketken jón. Men keıde mınıstrlikti aıaımyn, sebebi janjaqtan qysym, shabýyldar júrýde, istiń mánisin mınıstrden basqanyń bári biletin sııaqtanyp ketedi, alaıda naqty ne isteý kerektigin aıtyp jatqany shamaly». Biraq bul árıne, AShM basshysyn syneskertpelerden qutqara almady. Bul jaıynda «Qar astynda nege qalady?» degen maqaladan tolyq oqı alasyzdar.
Osy basylymda «Alyptar eli» degen maqala jarııalandy. Zúlfııa Chınshanlo álem rekordyn jańartty, úshinshi ret álem chempıony atandy! Jazıra Japparqul qazaq qyzdarynan birinshi bolyp álemdik dodanyń kúmis júldesin jeńip aldy! Jasulan Qydyrbaev eresekter arasyndaǵy alǵashqy jarysynda-aq álem chempıony ataǵyna qol jetkizdi! Ilıa Ilın jańa salmaq dárejesinde altyn alyp qana qoımaı, bir baǵdarlamada álem rekordyn birden 4 kelige jańartty! Vladımır Sedov álem chempıonatyndaǵy jetispeı turǵan medalin tolyqtyrdy - Qydyrbaevtyń salmaǵynda kúmis aldy!
«Munyń syrtynda úzdik tórttikti túıindegen Kırıll Pavlovty, alǵashqy altylyqqa ilingen Karına Gorıcheva men Anna Nurmuhambetovany, Arlı Chonteıdi esten shyǵarmańyz. Londondaǵy tamasha jeńisinen keıin sportqa oralyp, salmaq aýystyrsa da, úzdik segizdikke kirgen Maııa Maneza she? Eresekter tobyna tuńǵysh ret aralassa da, ondyqtan oıyp turyp oryn alǵan Albert Lınder taǵy bar. Azııa oıyndarynan keıin sál bosańsyǵan Margarıta Elıseevany múlde umytyp ketýge jáne bolmaıdy», - dep jazady gazet.
***
«Ana tili» gazetiniń sońǵy sanynda «Mamandyqtyń bári jaqsy ... Alaıda zaman talabyn da eskergen jón» atty kólemdi maqala basylǵan. «Jastar bolashaq mamandyǵyn durys tańdaı bile me? Árbir adamnyń bolashaǵy tańdaǵan mamandyǵyna da baılanysty ekeni anyq. Sol sebepti mamandyq tańdaý ońaı emes.
Shyny kerek, keıbir jastarymyz jaqsy maman ıesi bolsam dep oılaı bermeıdi. Áıteýir, bir mamandyqty tańdaı salyp, dıplom alyp shyqsam boldy deıdi. Sonda sany kóp, sapasy joq dıplomnan ne paıda? «Túıir nan - tamshy ter» demekshi, jaqsy maman ıesi bolý úshin kóp izdenis, oqý, bilim alý, eń bastysy mamandyqqa degen súıispenshilik qajet», - dep jazady maqala avtory.
-0-
