Qapshaǵaıda Medeýden eki ese úlken muz aıdyny salyndy
QONAEV. KAZINFORM — Jyl basynan beri Almaty oblysyna 2,2 mln týrıst keldi. Olar Kólsaı, Qaıyńdy, Qapshaǵaı oryndaryna barǵan. Bul týraly oblys ákimi Marat Sultanǵazıev baıandady.
Onyń aıtýynsha, Almaty oblysy — geografııasy men tabıǵı resýrstary týrızmdi damytýǵa erekshe qolaıly, áleýeti joǵary óńir. Búginde oblysqa kelgen týrıster sany 2,2 mln adamǵa jetip, ótken jylmen (2024 j. — 1,6 mln) salystyrǵanda 36% ósim kórsetti.
— Qapshaǵaı sý qoımasy Qonaev qalasynyń negizgi demalys ortalyǵyna aınaldy. 2025 jylǵy jazǵy maýsymda munda 2 mıllıonǵa jýyq adam kelip, byltyrmen salystyrǵanda 20% ósimdi kórsetti. Demeýshiler qoldaýymen qalalyq jaǵajaıda aýqymdy abattandyrý jumystary júrgizildi, — dedi M. Sultanǵazıev Ortalyq kommýnıkatsııalar qyzmetinde ótken brıfıngte.
Qazir quny 83,2 mlrd teńge bolatyn Aqtas ústirtindegi «Oi-Qaragai» taý-shańǵy kýrortyn keńeıtý jobasy júzege asyrylyp jatyr. Kýrorttyń basty ereksheligi — uzyndyǵy 28 shaqyrym bolatyn elimizdegi jáne Ortalyq Azııadaǵy eń uzyn shańǵy trassasynyń bolýy. Sonymen qatar, kýrort jyldyń tórt mezgilinde úzdiksiz jumys istep, jyl saıyn shamamen 600 myń týrıstke qyzmet kórsetedi.
Qapshaǵaı kóli jaǵalaýynda quny 11 mlrd teńge bolatyn «ASP-Arena» halyqaralyq deńgeıdegi sport arenasy, 4 000 myń oryndyq stadıon iske qosyldy.
Onda aýdany 20 myń sharshy metr bolatyn, Medeýden eki ese úlken, Ortalyq Azııadaǵy eń úlken muz aıdyny qonaqtardy qabyldaýǵa daıyn.
— Oblystyń týrızm salasy úshin Qaıyńdy jáne Kólsaı kólderiniń erekshe mańyzy bar. Munda jaıaý júrginshiler joldary tolyq abattandyrylyp, Qaıyńdy kóline baratyn 9 shaqyrym jolǵa kúrdeli jóndeý jumystary bastaldy. Bul baǵytqa kelgen týrıster sany ótken jylmen salystyrǵanda 1,6 esege ósip, 600 myń adamǵa jetti, — dep atap ótti ákim.
Іle ózeni jaǵasyndaǵy «Kóshpendiler» qalashyǵy da ákimdiktiń balansyna alyndy. Aldaǵy ýaqytta bul nysan tolyq jańartýdan ótedi.
Buǵan deıin ákim Almaty oblysynyń ekonomıkasy 6 trln teńgege deıin óskenin aıtqan edi.
Sondaı-aq, «Pepsi Co» kompanııasy Narynqol kartobynan daıyn ónimder shyǵarady.