Kanvon Olımpıadasy-2024: Qaı sport túrinen medal kútemiz
Ońtústik Koreıanyń Kanvon qalasynda ótetin IV qysqy jasóspirimder Olımpıadasynda qaı sport túrlerinen kimder medal alýy múmkin ekeni aıtyldy, dep habarlaıdy Kazinform.
Sportty damytý dırektsııasy taratqan málimetterge súıensek, atalǵan dodada júldeden basty úmitker sportshylarymyz — short-trek sheberleri.
«Bul joly Ulttyq qurama 4 short-trek sheberinen úmit kútedi. Tórt jyl buryn Lozannaǵa Sanjar Janysov pen Marııa Gorbýnova ǵana barǵan. Meıirjan Tólegen, Erasyl Shyńǵyshan, Anastasııa Astrahantseva men Polına Omelchýk – joǵaryda aıtylǵan elimizdegi IV qysqy jastar sport oıyndarynyń jeńimpazy men júldegeri. Osy tusta Meıirjan Tólegen men Erasyl Shyńǵyshan úshin alǵashqy halyqaralyq keshendi jarys emesin aıta ketken jón. Qos atlet byltyr aqpanda Reseıdiń Kemerovo qalasynda bolǵan «Azııa balalary» ІІ qysqy oıyndarynda jasyndaı jarqyldaǵan. Meıirjan – sol kezde qazaq short-trekshiler arasyndaǵy jalǵyz altynnyń ıegeri», - dep atap ótilgen habarlamada.
Sondaı-aq, short-trekten Qazaqstan jastar quramasynyń aǵa jattyqtyrýshysy Danabek Haırov ta short-trekshilerdiń aldaǵy Olımpıadaǵa daıyndyǵy oıdaǵydaı júrip jatqanyn málim etti.
«Qazir daıyndyq jospar boıynsha ótip jatyr. Maýsymnyń ortasy bolǵandyqtan bári babynda. Bizde uldar men qyzdar birdeı joǵary qarqynda jarysa alady. Maqsat bireý ǵana. Barynsha joǵary nátıje kórsetýge tyrysamyz. Osy joly short-trekten jekeleı synda 1500 metrge jarys qosyldy. Bul biz úshin taǵy bir jaqsy jańalyq. Aldyn tek 500-1000 metrge júlde sarapqa salynǵan», - deıdi short-trekten Qazaqstan jastar quramasynyń aǵa jattyqtyrýshysy.
Sonymen qatar konkımen júgirýden baq synaıtyn sportshylar da júldege laıyqty ekeni aıtyldy.
Búgingi tańda olar óz jas sanatyndaǵy halyqaralyq jarystarǵa baryp, tájirıbe jınap úlgergen. Máselen, Mıhaıl Matrıýhın byltyr Reseıde ótken «Azııa balalary» ІІ qysqy oıyndarynda kúmis júldege qol jetkizip, básekege daıyn ekenin kórsetken.
«Sporttyń bul túrinen Ońtústik Koreıaǵa baratyn qyz-jigitterdi byltyr jeltoqsanda Qazaqstan Kýbogynda iriktedik. Kele jatqan oıyndarda barlyǵynyń júlde alatyn múmkindigi birdeı. Qazir dóp basyp aıtý qıyn. Bizdiń sportshylar osyǵan deıin halyqaralyq jarystarǵa qatysyp kórgen. Rýslan Janadilov, egizder Alına Shýmekova men Krıstına Shýmekova birneshe aı buryn Italııada ótken jastar arasyndaǵy Álem Kýbogy kezeńderinde jaqsy kórsetkishke qol jetkizdi. Alına men Krıstına júldeli orynnan kórindi. Qazir bári Astana qalasynda Dırektsııa uıymdastyryp jatqan oqý-jattyǵý jıynynda júr», - deıdi konkımen júgirýden Memlekettik jattyqtyrýshy Kenjesh Sársekenova.
Delegatsııa sapyndaǵy Alema Qarabaeva, Ilıa Mızernyh, Ilıa Shılnıkov jáne Mereı Tastemir syndy ózge sportshylar osyǵan deıin shetelde birneshe márte synǵa túsip, bapkerler nazaryna ilikken.
Esterińizge sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi. Al Frantsııanyń Parıj qalasynda XXXIII jazǵy Olımpıada osy jyldyń 26 shildesi men 11 tamyzy aralyǵynda ótse, HVІІ Jazǵy Paralımpıada bıyl 28 tamyz - 8 qyrkúıek aralyǵynda ótedi.
Kanvon qalasynda el namysyn qorǵaýǵa 42 atletimiz attanady.
Búgin Olımpıadaǵa baratyn sportshylarymyzdyń esimi anyqtaldy.
