Kanvon-2024: Jeńimpazdar qandaı medaldarmen marapattalady
Ońtústik Koreıanyń Kanvon qalasynda ótetin IV qysqy jasóspirimder Olımpıadasynyń jeńimpazdary men júldegerlerine qandaı medaldar beriletini belgili boldy, dep habarlaıdy Kazinform.
Búgin QR Týrızm jáne sport mınıstrligi Sportty damytý dırektsııasynyń Instagram paraqshasynda IV qysqy jasóspirimder Olımpıadasynyń jeńimpazdary men júldegerlerine tabystalatyn medaldiń fotosy men resmı ataýy paıda boldy.
Jasóspirimder arasyndaǵy IV qysqy Olımpıada oıyndarynyń júldegerlerine beriletin medaldiń ataýy — «Jarqyraǵan bolashaq» bolady.
Sondaı-aq, Olımpıada medaliniń dızaınyn jasaýǵa 2023 jyly 120 memleketten 3000-nan astam úmitker qatysqanyn, solardyń arasynan tek, 27 jastaǵy Brazılııa azamaty Dante Akıra Ývaıdyń týyndysy úzdik dep tanylǵany belgili boldy.
Eske sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi.
Qazaqstan namysyn sporttyń bes túri men 10 dıstsıplına boıynsha 42 sportshy qorǵaıdy. Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha baq synaıdy.
Bizdiń sportshylar 30 joldama jeńip aldy.
