Kanvon-2024: Tý ustap shyǵatyn sportshylardyń qandaı jetistikteri bar
Sanaýly kúnderden keıin Ońtústik Koreıada alaýy tutanatyn qysqy Jasóspirimder Olımpıadasynyń ashylý saltanatynda elimizdiń kók Týyn ustap shyǵatyn sportshylar anyqtalǵan bolatyn, dep habarlaıdy Kazinform.
Osyǵan deıin habarlaǵanymyzdaı, «Memleketter sherýi» kezinde Qazaqstannyń baıraǵyn petropavldyq konkımen júgirý sportynyń ókili Krıstına Shýmekova men oraldyq short-trekshi Erasyl Shyńǵyshan ustap shyǵady.
Osy eki sportshymyz atalǵan qurmetke qandaı jetistikteriniń arqasynda tańdaldy?
Sportty damytý dırektsııasynyń málimetinshe atalǵan sportshylar jarystardaǵy joǵary jetistikteri úshin ǵana emes, sonymen qatar halyqaralyq arenadaǵy jeńiske degen jigeri úshin tańdalǵan.
Atap aıtsaq, on segiz jasar Krıstına Shýmakova konkımen júgirý sportynan QR sport sheberi, óziniń jasy sanatyndaǵy Qazaqstan Respýblıkasynyń chempıony, 2023 jylǵy Álem Kýbogynyń ıtalıandyq kezeńiniń kúmis júldegeri.
Al on jeti jasar ekinshi tý ustaýshy sportshymyz Erasyl Shyńǵyshan short-trekten sport sheberine kandıdat, óziniń jasy sanatyndaǵy Qazaqstan Respýblıkasynyń chempıony, sondaı-aq «Azııa balalary» 2023 halyqaralyq jarysynyń kúmis júldegeri.
Osy oraıda QR UOK sport departamentiniń dırektory Elsııar Qanaǵatov el Týyn ustap shyǵatyn sportshylar týraly óz oıymen bylaı bóisti.
«Krıstına men Erasyl - bizdiń myqty jáne birtutas komandamyzdyń jarqyn ókilderi. Olardyń kásibıliligi, ynta-jigeri men sportqa berilgendigi Ońtústik Koreıaǵa baratyn bizdiń jasóspirimder quramasynyń eń jaqsy qasıetterin kórsetedi. Bul jastar qazaqstandyq sporttyń jańa býynynyń bet-beınesi bolyp tabylady jáne biz olardyń Kanvon qalasynda ótetin qysqy jasóspirimder Olımpıadasynda kórsetetin ónerin asyǵa kútemiz jáne osy oıyndarǵa qatysý bizdiń sportshylarymyzǵa iri halyqaralyq jarystarda óner kórsetýde qundy tájirıbe alýǵa múmkindik beredi dep úmittenemiz», - dep atap ótti ol.
Eske sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi.
Qazaqstan namysyn sporttyń bes túri men 10 dıstsıplına boıynsha 42 sportshy qorǵaıdy. Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha baq synaıdy.
