Kanvon-2024: Olımpıadanyń boıtumary Astanaǵa keldi
Ońtústik Koreıanyń Kanvon qalasynda ótetin IV qysqy jasóspirimder Olımpıadasynyń boıtumary Astanaǵa keldi, dep habarlaıdy Kazinform.
QR Týrızm jáne sport mınıstrliginiń baspasóz qyzmeti málim etkendeı, Olımpıadaǵa daıyndyq jónindegi shtabtyń jumysy jalǵasyp jatyr.
Kanvondaǵy Jasóspirimder arasyndaǵy qysqy Olımpıada qarsańynda shtab keńsesinde Týrızm jáne sport mınıstri Ermek Marjyqpaev pen Koreıa Respýblıkasynyń Qazaqstandaǵy Tótenshe jáne Ókiletti Elshisi Chjo Te-Ik kezdesti.
Koreıa Respýblıkasynyń Elshisi Qazaqstanmen týrızm jáne sport salasynda ózara yntymaqtastyqta jumys isteýge múddeli ekendigin jetkizdi.
Kezdesý barysynda eki eldiń ókilderi Oıyndardy talqylap, osy jarystan, qazaqstandyq sportshylardan qandaı nátıje kútetinine qatysty oı bólisti.
Jıyn sońynda Koreıa Respýblıkasynyń Elshisi Jasóspirimder Olımpıadasynyń boıtumaryn syılap, Qazaqstan sportshylaryna aldaǵy baıraqty básekede sáttilik tiledi.
«Kanvondaǵy Jasóspirimderdiń qysqy Olımpıadasynyń boıtumary bizdiń shtab keńsesinde óz ornyn taýyp, aldaǵy tórt jyldyqtyń basty básekesine qatysatyn qyz-jigitterimizge sáttilik alyp keledi degen senimdemiz», - dedi Ermek Marjyqpaev.
Eske sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi.
Qazaqstan namysyn sporttyń bes túri men 10 dıstsıplına boıynsha 42 sportshy qorǵaıdy. Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha baq synaıdy.
