Qańtarda elimizde 7 mln tonna munaı óndirildi
«Kórsetilgen kezeńde munaı jáne kondensat óndirý kólemi 7 mln tonnaǵa jetip, qańtar aıy josparynyń 98,3 paıyzyn qurady. Sonyń ishinde munaı-gaz salasyndaǵy iri kompanııalar boıynsha kórsetkishter tómendegideı: Teńiz jobasynda atalǵan kezeńde 2,05 mln tonna munaı óndirildi. Bul esepti aıdyń josparyna 95,8 paıyzdy quraıdy»,- dedi ol.
Mınıstrdiń aıtýynsha, jospardyń oryndalmaýyna qańtardaǵy qolaısyz meteorologııalyq jaǵdaılar, atap aıtqanda tuman, jańbyr, ylǵaldylyq, muzdaq sebebinen elektr jelilerindegi joǵary voltty kommýtatsııalyq qurylǵylarda «kerneý ushqyndaýy» sebep bolyp otyr. Joǵaryda atalǵan tehnologııalyq buzýshylyqtardyń saldarynan «Teńizshevroıl» jáne «Atyraý munaı óńdeý zaýyty» nysandarynda apattyq toqtaýlar oryn aldy. «2-býyn» qondyrǵysy (60 MVt) zaýyty jáne «shıki gazdy aıdaý» zaýyty eki táýlikke toqtady.
«Osy tehnologııalyq buzýshylyqtarǵa sáıkes, Energetıka mınıstrligi atomdyq jáne energetıkalyq qadaǵalaý men baqylaý komıtetiniń basshylyǵymen birge múddeli taraptardy tarta otyryp, tergeý júrgizýde», - dedi Nurlan Noǵaev.
Onyń dereginshe, Soltústik Kaspıı jobasy – Kashaǵanda munaı óndirý kólemi 1,23 mln tonna bolyp, jospar 100 paıyz oryndaldy. Qarashyǵanaq jobasynyń kórsetkishi 1,1 mln tonnany qurap otyr. Jospar 101 paıyzǵa artyq.
«Esepti kezeńde 5,5 mln tonna munaı eksporttaldy. Jospar 100 paıyz oryndaldy», - dedi ol.
