Qańtar qasireti: Qaıtys bolǵandar men zardap shekkenderge qansha ótemaqy tólenedi
Tártipsizdikter barysynda 225 adam qaza boldy. Olardyń arasynda áskerıler de, terraktilerge qatysqan, ǵımarattar men quqyq qorǵaý qyzmetkerlerine shabýyl jasaǵan qarýly bandıtter de bar. Osy oraıda, m emleket basshysy Qasym-Jomart Toqaev eldegi jaǵdaıdy turaqtandyrý úshin jedel is-qımyldar jospary n ázirleýge tapsyrma bergen edi. Atalǵan jospardyń bir bóligi jaraqat alǵan tıisti organdardyń qyzmetkerlerine ótemaqy tóleýdi, qaza tapqan organdar men beıbit azamattardyń otbasylaryna kómek kórsetý sekildi máselelerdi qamtıdy. Osy oraıda, qaıtys bolǵan qyzmetkerlerdiń otbasyna qansha ótemaqy tólenedi, olardyń ata-anasyna jáne balalaryna taǵy qandaı jeńildikter qarastyrylady, sonymen qosa eń kóp zardap shekken shahar Almatydaǵy jeke tulǵalarǵa qandaı kómek kórsetiletini jóninde Qazaqparat agenttigi sarapshysynyń materıalynan oqı alasyzdar.
Memleket basshysynyń áleýmettik-ekonomıkalyq jaǵdaıdy turaqtandyrý boıynsha berilgen tapsyrmasyna sáıkes, Іshki ister mınıstrligi birqatar is-sharany qolǵa almaq.
Birinshiden, áskerı daıarlyqty jáne qamtamasyz etýdi arttyryp, áskerı qyzmetshilerdiń moraldyq rýhyn kóterý boıynsha sharalar qabyldaý kózdelip otyr. Іshki ister mınıstri Erlan Turǵymbaev úkimet otyrysynda eń aldymen, arnaıy bólinisterdiń materıaldyq-tehnıkalyq bazasyn nyǵaıtý josparlanǵanyn atap ótken edi. Onyń dereginshe, jalpy materıaldyq bazany nyǵaıtý úshin Úkimet rezervinen 20,7 mlrd teńge bólingen. Endi memlekettik satyp alý rásimderi jasalmaq.
Al, jeke quramnyń áskerı rýhyn kóterýge qatysty Otandy súıýge, qyzmettik mindetke adal bolýǵa tárbıeleý boıynsha da is-sharalar jospary bekitilgen. Máselen, qıyndyqqa shydaý, tózimdi bolýǵa baýlıtyn arnaıy trenıgter uıymdastyrylatyn bolady. Sonymen qosa, yntalandyrý maqsatynda qyzmetkerlerdiń eńbegin baǵalaý turaqty júzege asyrylady. Mysaly, tótenshe jaǵdaı kezinde quqyqtyq tártipti qamtamasyz etken qyzmetkerlerge 150 myń teńge, kýrsanttar men áskerılerge baǵaly syılyqtar berilmek.
Ekinshiden, mınıstrdiń málimetinshe, dıplomatııalyq ókildikterdi, ınvestıtsııa sýbektilerin jáne shetel kompanııalarynyń bıznesin qorǵaý boıynsha sharalar qabyldaý da qolǵa alyndy.
«Qazirgi ýaqytta ishki ister organdary erekshe rejımde qyzmet atqarady. Patrýldik polıtsııa jasaqtarynyń sany ulǵaıtyldy. Asa mańyzdy memlekettik obektilerdiń kúzeti kúsheıtildi. Dıplomatııalyq mıssııalardyń ǵımarattaryna qosymsha qarýly beketter qoıyldy. Mamandandyrylǵan kúzet qyzmetimen 73 dıplomatııalyq mıssııa kúzetiledi», - dep tolyqtyrdy mınıstr úkimet otyrysynda.
Úshinshiden, qańtar oqıǵasy kezinde qaıtys bolǵan áskerı qyzmetkerlerdiń jáne ishki ister organdary qyzmetkerleriniń otbasylaryna birjolǵy ótemaqy tóleý qarastyrylyp otyr. Erlan Turǵymbaevtyń dereginshe, jaqynda qańtarda terrorıster qolynan polıtsııa men Ulttyq ulannyń 8 qyzmetkeri qaıtys bolyp, 2 911 qyzmetker jaraqat aldy. Erlikpen qaza bolǵandar 2-dárejeli jáne 3-dárejeli «Aıbyn» ordenimen marapattaldy.
Qaıtys bolǵan qyzmetkerlerge qansha tólemaqy tólenedi
ІІM baspasóz qyzmetiniń málimetinshe, qazirgi ýaqytta qyzmet kezinde qaıtys bolǵan qyzmetkerlerge ótemaqy tóleýge qatysty esepteý jumystary júrgizilip jatyr.
«Quqyq qorǵaý qyzmeti týraly» QR zańynyń 66-baby boıynsha qaza tapqan qyzmetkerlerdiń otbasylaryna áleýmettik kepildikter kózdelgen. 2011 jylǵy 6 qańtardaǵy «Quqyq qorǵaý qyzmeti týraly» QR zańnamasynyń 66-baby 3-tarmaǵyna sáıkes, quqyq qorǵaý organdarynyń qyzmetkeri qyzmettik mindetin atqarý kezinde ne bolmasa qyzmetten bosatylǵannan keıin bir jyl ishinde tıisti qyzmettik mindettin atqarý kezinde alǵan jaraqat saldarynan qaza tapqan jaǵdaıda, asyraýyndaǵylarǵa nemese muragerlerge sońǵy atqarǵan laýazymy boıynsha alpys aılyq (5 jyl) aqshalaı qarajaty mólsherinde birjolǵy ótemaqy tólenedi.
Sondaı-aq, zańnyń 67-baby boıynsha, úsh aılyq aqshalaı qarajaty mólsherinde birjolǵy aqshalaı ótemaqy tóleý túrinde jerleýge arnalǵan shyǵyndardy óteý qarastyrylǵan.
Ata-anasyna qandaı kómek kórsetiledi
QR 2012 jylǵy 16 aqpandaǵy № 561-IV «Áskerı qyzmet jáne áskerı qyzmetshilerdiń mártebesi týraly» zańynyń 51-baby 2-tarmaǵyna sáıkes, áskerı qyzmetshilerdiń ata-anasyna da ótemaqy tólenedi. Máselen, áskerı qyzmetshi qyzmetin atqarý kezinde ne áskerı qyzmet ótkerý kezeńinde alǵan jaraqaty (jaralanýy, jaraqattanýy, kontýzııasy) nemese aýrýy saldarynan qyzmetten bosatylǵannan keıin qaza tapqan (qaıtys bolǵan) jaǵdaıda, áskerı qyzmetshiniń muragerlerine qaza tapqan kúni sońǵy atqarǵan laýazymy boıynsha bes jyldyq aqshalaı qamtylym mólsherinde ótemaqy beriledi. Al, merzimdi áskerı qyzmettegilerdiń, áskerı oqý orny kýrsanttarynyń, áskerge shaqyrylǵan áskerı mindettilerdiń muragerlerine 500 aılyq eseptik kórsetkish mólsherinde birjolǵy aqshalaı ótemaqy tólenedi.
Qaza tapqandardyń balalarynda qandaı jeńildikter bar
Qyzmettik mindetterin atqarý kezinde qaza tapqan qyzmetkerdiń balalaryna kámeletke tolǵanǵa deıin QR úkimeti belgilegen tártippen medıtsınalyq jáne sanatorıı-kýrorttyq qyzmetti paıdalaný quqyǵy saqtalady. Sondaı-aq, qyzmetkerlerdiń balalary áskerı mektep-ınternattarǵa jáne kadet korpýstaryna konkýrstan tys qabyldaný quqyǵyn paıdalanýǵa múmkindigi bar. Sonymen birge, oqýǵa túsýshiler úshin belgilengen talaptar boıynsha baldyń shekti deńgeıin jınaǵan jaǵdaıda, quqyq qorǵaý organynyń bilim berý uıymdaryna konkýrstan tys qabyldanady.
Budan bólek, baspasóz qyzmetiniń sózinshe, mınıstrlikQR Bilim jáne ǵylym mınıstrligimen, sondaı-aq jergilikti atqarýshy organdarmen birlesip, oqý protsesteri jáne turǵyn úı máselesi boıynsha birqatar jeńildik jasaý máselesin pysyqtap jatyr.
Almatyda zardap shekken jeke tulǵalarǵa qansha ótemaqy tólenedi
Budan bólek, 2022 jyldyń 24 qańtarynan bastap Almaty qalasynda tártipsizdik kezinde zardap shekken jeke tulǵalarǵa ótemaqy tóleý protsesi bastaldy. Bul týraly 24 qańtarda shahar basshysy Baqytjan Saǵyntaevtyń tóraǵalyǵymen ótken Almatynyń tynys-tirshiligin qalpyna keltirý jónindegi qalalyq shtab otyrysynda ákimniń orynbasary Іlııas Óserov aıtty.
Zardap shekken jeke tulǵalar qatarynda memlekettik organdardyń, aýrýhanalar men BAQ-tyń 603 qyzmetkeri bar. Ákim orynbasarynyń málimetinshe, onyń ishinde 592 quqyq qorǵaý organdarynyń qyzmetkeri, Tótenshe jaǵdaılar departamentiniń 1 qyzmetkeri, jergilikti atqarýshy organdardyń 3 qyzmetkeri, «Almaty» telearnasynyń 1 qyzmetkeri jáne medıtsınalyq uıymdardyń 6 qyzmetkerine ótemaqy tóleý kózdelgen.
Іlııas Óserovtyń dereginshe, aýyr dárejede zaqym kelgen jaǵdaıda - 2 mln teńge, ortasha dárejede - 1 mln teńge, jeńil túrde – 500 myń teńge beriledi.
Sonymen qatar, ol TJ kezinde jumyldyrylǵan polıtsııa departamentiniń 3878 qyzmetkerine, Tótenshe jaǵdaılar departamentiniń 1207 qyzmetkerine, Qoǵamdyq densaýlyq basqarmasynyń 3888 qyzmetkerine, qutqarý qyzmetiniń 93 qyzmetkerine 100 myń teńge qarjylaı kómek tólenetinin de atap ótti.
«Búgin tıisti qujattar qarjy mekemesine jiberilip, tústen keıin alǵashqy tólemder jasalady», - dep tolyqtyrdy Almaty ákiminiń orynbasary.
Onyń sózinshe, polıtsııa departamentine tıisti tergeý áreketteri aıaqtalǵannan keıin zardap shekken avtokólikterge tólemderdi qamtamasyz etý úshin shamamen 200 mln teńge mólsherinde bastapqy soma jiberiledi. Qajet bolǵan jaǵdaıda bul soma kóbeıtilmek.
Zardap shekkenderdiń nesıesi úsh aıǵa keıinge shegerildi
Qarjy naryǵyn retteý jáne damytý agenttigi Qarjylyq qyzmetterdi tutynýshylardyń quqyqtaryn qorǵaý departamentiniń dırektory Aleksandr Terentevtiń málimetinshe, elde bolǵan tártipsizdik kezinde zardap shekken zańdy jáne jeke tqlǵalardyń nesıesi úsh aıǵa keıinge shegerilmek.
«Zardap shekken barlyq zańdy jáne jeke tulǵanyń nesıesi tótenshe jaǵdaı engizilgen kúnnen bastap úsh aıǵa shegeriledi. Qaryzdar men mıkrokredıtter boıynsha keıinge shegerý kezeńinde barlyq bank pen mıkroqarjy uıymy aıyppuldyń, ósimpuldyń somasyn eseptemeıdi», - dedi Terentev Ortalyq kommýnıkatsııalar qyzmetinde ótken baspasóz májilisinde.
Budan bólek, departament dırektory qańtar oqıǵasy kezinde qaza tapqandardyń nesıesi keshiriletinin atap ótti. Onyń aıtýynsha, memleket basshysynyń tapsyrmasyna sáıkes,tártipsizdik kezinde qaza tapqan áskerı qyzmetshilerdiń nesıeleri esepten shyǵarylady. Agenttik dál osyndaı jumysty tártipsizdik kezinde qaza tapqan azamattardyń da tizimi boıynsha júrgizetin bolady.
Nazerke Súıindik
