Qańtar aıynda zeınetaqy qoryndaǵy jınaqtar 97 mlrd teńgege kóbeıdi

NUR-SULTAN. QazAqparat - 2020 jyldyń qańtarynda Biryńǵaı jınaqtaýshy zeınetaqy qoryndaǵy zeınetaqy jınaqtary 97 mlrd teńgege kóbeıdi, dep habarlaıdy QazAqparat «BJZQ» AQ-nyń baspasóz ortalyǵyna silteme jasap.

«2020 jyldyń 1 aqpanyndaǵy jaǵdaı boıynsha barlyq negizgi kórsetkishter byltyrǵy jyldyń sáıkes kezeńimen salystyrǵanda oń sıpatqa ıe. Zeınetaqy jınaqtarynyń jalpy somasy 10,9 trıllıon teńgeni qurap, bir jyl ishinde 16 paıyzǵa ósti. Jınaqtardyń basym bóligi mindetti zeınetaqy jarnalary (MZJ) esebinen qalyptasqan. Al MZJ esebinen jınalǵan jınaq aqsha 10,6 trln teńgeni qurady. Bir jyl ishindegi ósim – 15 paıyz», delingen habarlamada.

Zeınetaqy júıesiniń biryńǵaı operatory málimetinshe, mindetti kásiptik zeınetaqy jarnalary (MKZJ) boıynsha zeınetaqy jınaqtarynyń somasy 251,2 mlrd teńgege (ósim – 25%), erikti zeınetaqy jarnalary (EZJ) boıynsha 1,9 mlrd teńgege (ósim – 4%) jetti.

2020 jyldyń qańtarynda zeınetaqy jınaqtary shamamen 97 mlrd teńgege ulǵaıdy.

Sońǵy 12 aı ishinde zeınetaqy jınaqtarynyń tabystylyǵy – 6,68 paıyzdy, al ınflıatsııa deńgeıi – 5,6 paıyzdy kórsetti. Osylaısha zeınetaqy aktıvteriniń naqty tabystylyǵy oń sıpatqa ıe.

Zeınetaqy jınaqtary týraly tolyq aqparatty enpf.kz saıtynan alýǵa bolady.