Qańtar aıynda álemde boıynsha 90 mıllıon adam koronavırýs juqtyrǵan
Bıylǵy alǵashqy bir aıdyń kórsetkishin ǵana 2021 jyldyń ekinshi jartysyndaǵy jaǵdaılarmen salystyrýǵa bolady, dep habarlaıdy QazAqparat reseılik TASS agenttigine silteme jasap.
Vırýs qaı elde qatty tarady ?
Sońǵy aptada ǵana álemde 22 mıllıon ınfektsııa rastalǵan. Alaıda, birqatar elderde aýrýlar qaıta azaıa bastady. Osyǵan baılanysty keıbir elderdiń bıligi negizgi shekteýlermen birge maska rejımin de alyp tastap jatyr. Koronavırýs keleshekte salqyn tıgizý sııaqty sımptomdarmen ótedi degenge ılanatyn elderdiń sany da artyp keledi.
Ótken aıda koronavırýspen syrqattaný jaǵdaıy ásirese AQSh-ta kóp tirkelgen. Munda shamamen shamamen 20 mıllıon adam aýyrǵan. Degenmen qańtardyń basynda kúnine 600 myńǵa jýyq jańa jaǵdaı tirkelse, ortasyna qaraı 900 myń, aıdyń sońǵy kúnderinde 300 myń jaǵdaı anyqtaldy.
Frantsııada 25 qańtarda 500 myńnan astam ınfektsııa juqtyrý jaǵdaıy tirkeldi. Biraq 1 aqpanǵa qaraı aýrý juqtyrý sany tórtten birge azaıdy.
Úndistanda kúnine 400 myńnan astam jaǵdaı baıqaldy. Qańtar aıynyń ortasynda eń joǵary kórsetkish bir kúnde 350 myńnan sál assa, al aıdyń aıaǵynda 170 myńǵa deıin tústi.
Argentınada qańtardyń ortasynda kúnine 140 myńǵa jýyq ınfektsııa tirkelse, qazir shamamen 40 myń jaǵdaı anyqtalyp otyr.
Qańtar aıynda Germanııada aýrý birden 10 esege ósti. Polsha men Chehııada kúnine shamamen 55 myń adam vırýs juqtyrǵan. Al Ýkraına men Rýmynııada kún saıyn shamamen 35 myń adam aýrý juqytrǵan. Reseıde bir aıda 1,4 mıllıon adam ınfektsııa juqtyrǵany habarlandy. Túrkııada bir aıdyń ishinde vırýs juqtyrý deńgeıi úsh ese ósken.
Eýropa shekteýlerdi alyp tastap jatyr
Ulybrıtanııada ınfektsııanyń taralý qarqyny jyl basynan beri úsh esege jýyq tómendegen. Qazir kún saıyn 80 myńǵa jýyq vırýs tirkelýde. Osyny eskerip, bılik elde vaktsına pasportynyń, maska rejımi men óz-ózin oqshaýlar sharalarynyń kúshin joıdy. Premer Borıs Djonson Ulybrıtanııa budan bylaı «COVID-19» indetin sýyq tııýmen birdeı dep qabyldaıtyndaı deńgeıge jetip otyr.
Shvetsııa bıligi 9 aqpannan bastap koronavıýrspen baılanysty shekteýlerdiń bárin alyp tastaý týraly sheshim qabyldady. Premer-Mınıstr Magdalena Anderssonnyń aıtýynsha, «ınfektsııa deńgeıi biraz ýaqytqa deıin joǵary bolady, biraq ınfektsııanyń eń aýyr saldary artta qalǵan». Shvetsııamen kórshiles jatqan Danııa, Norvegııa, Fınlıandııa, Shveıtsarııa elderi de shekteý sharalaryn alyp tastady.
Brazılııada aýrýdyń ósýi jalǵasyp jatqanyna qaramastan (táýligine 280 myńnan astam jaǵdaı tirkelgen), bılik koronavırýsty endemııalyq aýrý dep taný máselesin talqylap jatyr.
Ólim kórsetkishi azaıyp keledi
«Aýrýdyń kúrt ósýine qaramastan, álemde jańa ınfektsııanyń saldarynan ólim-jitim ósip jatqan joq Qańtar aıynda planetada 233 myńnan astam adam qaıtys boldy. Bul jeltoqsan aıyndaǵy kórsetkishten 10% asyp, bir jyl burynǵyǵa qaraǵanda aıtarlyqtaı az boldy», - dep jazady TASS agenttigi.
Qazir AQSh-ta koronavırýstan kún saıyn 3 myńnan astam ólim tirkelip otyr. 2021 jyldyń qańtarynda bul kórsetkishter bir jarym ese joǵary edi.
Tek Úndistanda ólim kúrt ósken. Ótken aıda táýligine 1 myńǵa jýyq naýqas qaıtys bolyp otyrǵan. Byltyrǵy shildeden beri mundaı bolmaǵan edi.
