Qańtar aıynda 134 myńǵa jýyq talapker UBT tapsyrdy
ASTANA. KAZINFORM – 134 myńǵa jýyq adam qańtar aıyndaǵy UBT-ny tapsyrdy. Ǵylym jáne joǵary bilim mınıstrliginiń málimetinshe, talapkerlerdiń 76,4%-y qazaq tilinde, 23,5%-y orys tilinde, 83 adam aǵylshyn tilinde testileýden ótken.
UBT bastalǵaly shekti baldy 77,5% - ǵa jýyq talapker jınady. Ortasha ball – 69. Eń joǵary ball – 137. Jalpy, 72 talapker 130-dan joǵary ball jınady.
Testke qatysýshylardyń basym bóligi «Bıologııa-Hımııa» kombınatsııalaryn tańdaǵan, atap aıtqanda, 18%-y tapsyrdy. Matematıka, fızıka pánderin 17% talapker tańdaǵan. Sondaı-aq, top-3 qataryna talapkerlerdiń 12% tańdaǵan «Matematıka-Informatıka» kombınatsııasy kirdi. Eń az tańdalǵan kombınatsııa – «Hımııa-Fızıka», ony 149 adam tapsyrǵan.
2024 jylǵy qańtar UBT-synyń qorytyndysy boıynsha talapkerler «Oqý saýattylyǵy» pánin joǵary deńgeıde tapsyrdy. Ortasha eseppen, suraqtardyń 78%-yna durys jaýap berilgen. Al «Fızıkany» tapsyrǵan talapkerlerdiń tek 33% tapsyrmany durys oryndaǵan, olar úshin «Salystyrmalylyq teorııasynyń elementteri» taqyryby qıyn boldy. Osylaısha, UBT nátıjeleri boıynsha Ulttyq testileý ortalyǵy tek sandar emes, sonymen qatar taqyryptar boıynsha egjeı-tegjeıli taldaýdy da usynady.
«Bilim-ǵylymǵa qushtar barsha talapkerlerdi UBT-nyń aıaqtalýymen shyn júrekten quttyqtaımyn! Qalaǵan mamandyqtaryńyzdyń ıesi bolýǵa tilektestigimdi bildiremin. Sultanmahmut Toraıǵyrov aıtqandaı, qazaqtyń kóginde kún bolyp, ultqa aıanbaı qyzmet ete berińizder», - dedi QR Ǵylym jáne joǵary bilim mınıstri Saıasat Nurbek.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń nátıjesinde qańtar UBT-syna 321 talapker qatysqanyn aıta ketken jón.
UBT ótkizý barysynda 157 ereje buzýshylyq anyqtalǵan. Onyń ishinde 107 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 50 adam shyǵarylyp, olardyń nátıjeleri joıyldy. Bógde tulǵalar anyqtalǵan joq. Talapkerler testileý aıaqtalǵannan keıin 30 mınýt ishinde apellıatsııaǵa bere aldy. Sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi bolady.
Aıta ketsek, 2024 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
Esterińizge sala ketsek, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq BBT-dan basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, sondaı-aq mektep bitiretin túlekter joǵary oqý oryndaryna aqyly negizde túsý úshin qatysty.
