Qanysh Sátbaevtyń 10 tomdyq shyǵarmalar jınaǵy jaryq kórdi
ASTANA. KAZINFORM — Astanada Qanysh Sátbaevtyń 10 tomdyq shyǵarmalar jınaǵynyń tusaýkeseri ótti.
12 sáýir — ult maqtanyshy, qazaq eliniń jerasty baılyǵynyń kózin ashqan, Qazaqstan ǵylym akademııasynyń negizin qalaýshy ári tuńǵysh prezıdenti, alǵashqy akademık Qanysh Imantaıuly Sátbaevtyń týǵan kúni. Elimizde Ǵylym qyzmetkerleriniń kúni osy kúnge oraılastyrylyp belgilengen. 10 tomdyqtyń tusaýkeseri de osy aıtýly data qarsańynda ótti.
— Byltyr, ózderińizge málim, Qanysh Sátbaevtyń 125 jyldyǵyn atap óttik. Sol sharaǵa daıyndalǵanda bir aqsaqaldyń sózi júregimdi tilip jiberdi. Ol kisi ózi eseptegen mynandaı bir qyzyq málimet keltirdi: Qanysh Sátbaevtyń izdenisteriniń arqasynda jer astynan shyǵarylǵan baılyqtyń quny 200 mlrd dollardan asyp ketipti. Bizge sál batyryp otyryp, 125 jyldyqqa bir 2 mlrd teńge shyǵara almaısyńdar ma degen bolatyn. Biz birden bul máseleni pysyqtap, kerekti qarjylandyrýdy, grantty shyǵaryp berdik. Óte jaqsy deńgeıde 500-den astam shara ótkizildi. Onyń ishinde 10-y — halyqaralyq konferentsııa, 20-sy — respýblıkalyq deńgeıdegi konferentsııa, 25-i — dóńgelke ústel, 445-i — ózge de sharalar. Ondaı sharanyń bári ótedi de ketedi. Sondyqtan biz naqty bir úlken jobalardy isteýimiz kerek dep sheship, osy toptamany qolǵa aldyq, — dedi QR Ǵylym jáne joǵary bilim mınıstri Saıasat Nurbek.
Basylym QR Ǵylym jáne joǵary bilim mınıstrliginiń qoldaýymen, Q.I. Sátbaev atyndaǵy Qazaq ulttyq tehnıkalyq zertteý ýnıversıtetiniń basqarýymen jáne «Halyqaralyq Sátbaev qorynyń» atsalysýymen jaryq kórdi.
Jınaqqa ǵalymnyń 1923–1963 jyldar aralyǵyndaǵy monografııalary, maqalalary, baıandamalary, geologııalyq barlaý esepteri men ǵylymı-tehnıkalyq jobalary, rýhanııat salasyndaǵy eńbekteri de engen. Barlyq materıaldar hronologııalyq jáne taqyryptyq tártippen júıelenip, qazirgi zamanǵy ǵylymı jáne baspa standarttaryna saı daıyndalǵan. Bul eńbekter Sátbaevtyń ǵylymı mol murasynyń tereńdigin, otandyq ǵylymnyń irgetasyn qalaýdaǵy tarıhı rólin jan-jaqty ashady.
— Kópten kútken 10 tomdyq qolymyzǵa tıdi. Bul — qasterli qazyna, baǵaly baılyq, Qanysh Sátbaevtyń murasy. Toptama biraz nárseden habar beredi: álemge áıgili akademıktiń búkil dúnıesi qamtylǵan, ǵylymı eńbekteri jınaqtalǵan, maqalalary toptastyrylǵan, jańadan tabylǵan eńbekteri qosylǵan, bıblıografııasy túzilgen. Qysqasy, kóp ter tógilgen, — dedi QR Prezıdentiniń keńesshisi Baýyrjan Omarov.
Jınaq «Atamura» baspasynan 10000 dana taralymmen jaryqqa shyǵyp, elimizdiń ǵylymı mekemelerine, joǵary oqý oryndaryna jáne kitaphanalaryna úlestirildi. Sonymen qatar, jınaqtyń tsıfrlyq nusqasy elektrondy kitaphanalar men ashyq ǵylymı platformalarda qoljetimdi bolady.
Ulttyq akademııalyq kitaphanada ótken sharaǵa QR Úkimetiniń músheleri, QR Parlamentiniń Senat jáne Májilis depýtattary, QR Prezıdenti janyndaǵy Ulttyq ǵylym akademııasy basshylyǵy men Ulttyq ǵylymı keńestiń músheleri, memleket jáne qoǵam qaıratkerleri qatysty.