Qanysh Sátbaev pen Kemel Aqyshevtiń birge túsken fotosýretteri tabyldy
PAVLODAR. KAZINFORM - Altyn adamdy tapqan áıgili arheolog Kemel Aqyshevtiń akademık Qanysh Sátbaevpen birge túsken sýreti Baıanaýyldaǵy mýzeıge tapsyryldy. Bıyl kórnekti ǵalymnyń týǵanyna 100 jyl tolyp otyr.
Jýyrda akademık Q.I.Sátbaevtiń Baıanaýyl memorıaldyq mýzeıine Qanysh Sátbaevtiń 125 jyldyǵy jáne áıgili arheolog Kemel Aqyshevtyń 100 jyldyǵyna oraı Kemel Aqyshevtyń nemeresi Maıa Álisherqyzy keldi. Ol ata-babasy týyp-ósken Baıanaýlanyń kıeli topyraǵyna alǵash kelip otyr eken. Maıa Aqysheva búginde Túrkııa elinde turady. Mamandyǵy jýrnalıs- korrespondent.
Bul týraly Akademık Q.I.Sátbaevtiń Baıanaýyl memorıaldyq mýzeıiniń buqaralyq jumys jónindegi mamany Sansyzbaı Saparǵalıev habarlady.
Daryndy urpaq daryǵan Shorman men Sátbaı áýleti - barshaǵa áıgili áýlet. Kemel Aqyshuly osyndaı asyldardyń synyǵy, ákesi Aqysh Shorman áýletinen. Naqty aıtsaq, Shormannan aty Alashqa áıgili Musa myrza Shormanuly, Mustafa Shormanuly, kezinde Sátbaı atamyzben qasıetti Mekkege qajylyqqa baryp sol jerden topyraq buıyrǵan Isa qajy Shormanuly jáne Áýjan Shormanuly týǵan. Kemel Aqyshev osy Áýjannan taraıdy. Anasy Ǵazıza Imantaıqyzy - Qanysh Imantaıulynyń týǵan ápkesi. Aqysh ata men Ǵazıza otbasynda segiz perzent kóredi. Qazaq halqynyń basynan ótken qasiret - asharshylyq bul áýletti de aınalyp ótpegen. Ókinishke qaraı, Rıshat, Qamar jáne Kemelden ózge balalary ashtyq jyldary kóz jumady. Aqysh Áýjanuly men Ǵazıza Imantaıqyzy da 30-jyldary ashtyqtan qaıtys bolǵan.
- Kemel Aqyshuly anasy qaıtys bolǵan soń aǵasy Qanysh Imantaıulynyń tárbıesinde bolǵany belgili. Almatydan mektep bitirisimen 1942 jyly ózi suranyp maıdanǵa attanǵan. Maıdannan 1944 jyly aýyr jaraqat alyp, elge oralady. Osyndaı qıyn kezderdi basynan ótkergen uly arheolog qazaq ǵylymynda óshpes iz qaldyrǵan ǵalym bola bildi. Jalpy Shorman, Sátbaı áýleti elimizdiń basynan ótken barlyq aıtýly oqıǵalardyń bel ortasynan tabylǵan. Uly Otan soǵysyna Kemelmen qatar baýyry Qamar Aqyshev pen Ǵalymtaı Sátbaev ta maıdan dalasynda el qorǵaǵan. Bir áýletten qurban bolǵan úsh arys Ábikeı Zeıinuly, Ǵazız (Bókesh) Imantaıuly, Ábdikárim Jáminuly Sátbaevtar úsheýi de elge asa qadirli de aıtýly adamdar bolǵan. Elge sińirgen eńbekteri eseneler, naǵyz tolysqan shaqtarynda naqaqtan naqaq ustalyp, 1937 jyly qurban boldy. Qaıdan topyraq buıyrǵany da belgisiz, - deıdi Akademık Q.I.Sátbaevtiń Baıanaýyl memorıaldyq mýzeıiniń buqaralyq jumys jónindegi mamany Sansyzbaı Saparǵalıev.
Bul saparynda Maıa Álisherqyzy Aqysh urpaqtary jaıly biraz aqparat usynǵan. Sonymen qatar mýzeı qoryna arnaıy ala kelgen 43 foto, 2 maqala jáne 16 tarıhı qujattar papkasyn tabystady. Qujattardyń ishinde sırek kezdesetin fotolar barshylyq. Sonyń ishinde Kemel Aqyshev pen Qanysh Sátbaevtiń birge túsken fotosy bar.
