Qańǵyrǵan ıtter qaptady: Óskemende bir aptada 11 adamdy ıt qapty

ÓSKEMEN. KAZINFORM – Óskemen turǵyndary kóshede ıesiz ıtterdiń qara qurttaı qaptap ketkenin aıtyp, dabyl qaǵyp jatyr. Bir aptada 11 adamdy ıt qapqan. 

қаңғыбас иттер
Фото: almaty.tv

Talap tastasa kim jaýap beredi...

«Aqbota» balabaqshasy Óskemendegi Jibek matalar kombınaty yqshamaýdanynda oryn tepken. Balasy sonda baratyn ata-ana kún saıyn balabaqsha aldynda qańǵyrǵan ıtterdiń qaptap júretinin jetkizdi.

- Balamdy qolǵa alyp, jaıaý qaıtqanda qorqamyn. Erteń ashyqqan ıt talap tastasa kim jaýap beredi?! Tek balabaqshada emes, jalpy bizdiń yqshamaýdanda buralqy ıtter tolyp ketti. Ózim Qazybek bı dańǵylyndaǵy sulýlyq salonynda jumys isteımin. Ǵımarattyń artqy jaǵynda da ıtter shubyryp júr, - deıdi Aıjan esimdi qala turǵyny.

Budan bólek, Zaşıta, Ahmer shaǵyn aýdandary, Shyǵys aýyly men Leshoz, Krasın, Menovnoe kentteriniń halqy da ıtterdiń shekten tys kóbeıip kele jatqanyn aıtýda. 

Áleýmettik jelide de jyl basynan beri ıtterdiń adamǵa tap berip jatqany kóringen vıdeolar tarap jatyr.

Atýǵa tyıym salynǵan

ShQO veterınarııa basqarmasynyń málimetinshe, 2022 jyldyń naýryz aıynda elde «Janýarlarǵa jaýapkershilikpen qaraý týraly» Zań kúshine enip, sol ýaqyttan beri ıesiz ıtterdi atýǵa tyıym salynǵan. 3 jyldyń ishinde oblys boıynsha kóshe kezgen ıtterdiń kóbeıip ketkeni sondyqtan.

- 2024 jyly oblys boıynsha 6 myń buralqy ıt aýlanyp, 1 976-sy evtanızatsııalandy. Búginde Óskemende 1 500-den astam ıt pen 50 astam ıtter tobyry bar, - delingen aqparatta.

Al, Shyǵys Qazaqstan oblystyq densaýlyq saqtaý basqarmasy ıtterden zardap shekkenderdiń kóbeıip kele jatqanyn rastady.

- 3-9 aqpan aralyǵynda Óskemende ıt qapqan 11 adam aýrýhanaǵa qaraldy. Ótken jyly qala boıynsha barlyǵy 467 adam qańǵyrǵan ıtterden zardap shekken, - dep habarlady basqarmanyń baspasóz qyzmetinen. 

Óskemen qalasynyń ákimi Almat Aqyshov bul máseleni birden sheshý múmkin emestigin jetkizdi.

- Zań boıynsha ıtterdi atýǵa ruqsat joq. Biz olardy tek aýlap, odan soń bir apta asyrap, fotosyn jan-jaqqa taratyp ıesin izdep, eger tabylmasa qaıta qoıa berýimiz kerek. Al,  Óskemende ıtterdi ustaıtyn arnaıy mekemeni salý úshin 2,5 mlrd teńge qarajat ketedi. Bul somaǵa bir mektep salýǵa bolady. Sondyqtan kóshelerdi ıtterden lezde tazartyp jiberý múmkin emes. Turǵyndardan túsinistik tanytýlaryn suraımyn, - dedi ákim. 

Eske salsaq, buǵan deıin Jetisý oblysynda ıtter mal men úı qustaryna shaýyp jatqany habarlanǵan. 

Сейчас читают