Qandaı jaǵdaıda elden maldy tirideı shyǵarýǵa tyıym salynady

ASTANA. KAZINFORM – Elimizden syrtqa mal satýǵa arnaıy kvota belgilengen. Sonyń aıasynda ár 6 aıda elden shyǵarylatyn maldyń naqty sany anyqtalady. Bul týraly Kazinform agenttigi joldaǵan saýalǵa Aýyl sharýashylyǵy mınıstrliginiń resmı jaýabynda aıtylǵan.

— Mınıstrlik Agroónerkásip kesheni óniminiń ımport-eksportyna turaqty monıtorıng júrgizedi jáne ımport-eksport ósiminiń joǵarylaý úrdisi týyndaǵan jáne ishki naryqqa qaýip tóngen jaǵdaıda den qoıý sharalaryn qabyldaý jónindegi tıisti usynystar Syrtqy saýda saıasaty jáne Halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń (VAK) qaraýyna jiberiledi, - delingen habarlamada.

Sondaı-aq vedomstvo qazirdiń ózinde elden urǵashy maldy shyǵarýǵa tyıym baryn atap ótken.

— Qazirgi tańda analyq malǵa tyıym salynǵan jáne buqashyqtar men erkek toqtylarǵa jańa kvota engiziledi. Eksport tek kvota sheńberinde júzege asyrylady, - dep jazylǵan jaýapta.

Aıta keteıik, buǵan deıin mınıstrlik elden tirideı mal shyǵarýǵa qatysty arnaıy kvota baryn málimdegen bolatyn.