Qandaı maman «Bolashaq» komıssııasynyń múshesi bola alady jáne oǵan qansha aqy tólenedi

ASTANA. KAZINFORM – «Bolashaq» baǵdarlamasy táýelsiz saraptamalyq komıssııasynyń quramy jyl saıyn jańartylyp otyrady, alaıda onyń múshelerine tólenetin syıaqynyń azdyǵy áli de ózekti másele bolyp otyr. Bul týraly «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov aıtyp berdi.

– Biz únemi komıssııanyń sandyq jáne sapalyq quramyn jetildirip otyramyz. Bıyl táýelsiz saraptamalyq komıssııa múshelerine suhbatty durys ótkizý boıynsha shaǵyn trenıngter uıymdastyramyz, – dedi Ádil Qusmanov Jibek joly telearnasyndaǵy «Ýáde» baǵdarlamasyna bergen eksklıýzıvti suhbatynda. 

Onyń aıtýynsha, 2025 jyly úmitkerlermen suhbat gıbrıdti formatta – bir bóligi onlaın, bir bóligi offlaın ótedi. Bul úshin ortalyq HR-mamandar qaýymdastyǵymen yntymaqtastyq ornatqan.

Sondaı-aq, spıker komıssııa jumysyna qatysý úshin qatań talaptar qoıylatynyn túsindirdi.

– Úmitkerdiń 10 jyl jumys tájirıbesi, onyń keminde 5 jyly mamandyǵy boıynsha bolýy kerek, magıstr dárejesiniń bolýy mindetti. Eger ǵylymı taǵylymdama úshin bolsa, onda doktorlyq dáreje, Hırsh ındeksi keminde 3 bolýy kerek jáne basqa da talaptar bar, – dedi ortalyq basshysy.

Sonymen qatar, Á. Qusmanov komıssııaǵa tólenetin aqynyń azdyǵy shekteýshi faktor ekenin moıyndady.

– Ashyq aıtaıyn, syıaqy óte tómen – biz jarty saǵattyq jumys úshin saraptamalyq komıssııa múshesine shamamen 1000 teńge tóleımiz. Bul óte az. Mundaı aqshaǵa kásibı mamandar komıssııa quramyna kirgisi kelmeıdi, – dep atap ótti ol.

Ádil Qusmanovtyń aıtýynsha, bul tarıfter buryn bekitilgen, al memlekettik bıýdjet qysqartylyp jatqan qazirgi jaǵdaıda olardy kóbeıtý-kóbeıtpeý belgisiz. 

Buǵan deıin Ádil Qusmanov «Bolashaq» stıpendııasynyń tıimdiligi zerttelip jatqanyn málimdegen edi. 

Á. Qusmanov baıqaýdyń ádil ótpeıtini týraly pikirlerge túsinikteme berdi jáne irikteý protsedýrasy úsh kezeńnen turatynyn jáne árbir kezeńde baqylaý elementteri bar ekenin aıtty. 

Sondaı-aq, Prezıdent synynan keıin «Bolashaq» taǵylymdamasyna jas shekteýleri engizildi.