Qandaı dári-dármek retseptsiz satylmaıdy

ALMATY. KAZINFORM — Densaýlyq saqtaý mınıstrligi tek retseptpen satylatyn dárilik preparattardy atady.

Qazaqstanda dárigerdiń retseptisi boıynsha ǵana dári-dármek satý — Densaýlyq saqtaý mınıstrliginiń jańa talaby emes.

Bul júıe 20 jyldan beri qoldanylyp keledi. 

Retseptsiz satylmaıtyn dárilik preparattarǵa mynalar jatady:

— quramynda esirtki, psıhotroptyq zattar men prekýrsorlar bar dárilik zattar;

— parenteraldyq engizýge arnalǵan dárilik zattar;

— statsıonar jaǵdaıynda ǵana qoldanylatyn dárilik zattar, onyń ishinde dıagnostıkalyq dárilik zattar;

— taǵaıyndaý men odan arǵy qabyldaý dárigerdiń turaqty baqylaýymen júrgizilýi qajet dárilik zattar;

— dıagnozy statsıonar jaǵdaılarynda nemese qajetti dıagnostıkalyq jabdyǵy bar mekemelerde qoıylatyn, al dárilik preparatty qoldaný jáne odan arǵy baqylaý ambýlatorııalyq jaǵdaılarda júzege asyrylatyn aýrýlardy emdeýge arnalǵan dárilik preparattar;

— quramynda odan ári zertteýdi talap etetin dárilik sýbstantsııa, belsendiligi jáne (nemese) keri áseri bar dárilik zattar:

— alǵash tirkelgen, jańa áser etýshi zaty bar dárilik preparattar;

— qoldanylý tájirıbesi shekteýli dárilik preparattar (dárilik preparattyń basqa elderde tirkeýden keıingi qoldaný tájirıbesin, sonyń ishinde jalpy kópshilikte qoldanylýy (klınıkalyq zertteýler bolǵan kezde) esepke ala otyryp);

— jańa doza, dozalaýdyń jańa rejımi, engizýdiń jańa tásili, qoldanýǵa jańa kórsetilimder, jas shamasynyń jańa toptary;

— Retseptsiz dárilik zattardy bosatqany úshin Ákimshilik quqyq buzý týraly kodekstiń 426-babynyń 1-bóligine sáıkes ákimshilik jaýapkershilik kózdelgen, — dep atap ótti mınıstrlikten.

Sondaı-aq vedomstvo ókilderi jaramdylyq merzimi aıaqtalǵan preparattardy qoldanýǵa bolmaıtynyn eske saldy.

— Mundaı preparat eń aldymen emdik qasıetterin joǵaltady. ıAǵnı, olar sizdi emdemeıdi jáne aýrý odan ári órbýi múmkin, bul óz kezeginde asqynýǵa aparyp soǵady. Sondaı-aq, preparatqa jaǵymsyz reaktsııalar paıda bolýy múmkin nemese preparattan ýlanyp qalýy múmkin. Osyndaı jaǵdaılar aǵzaǵa zııan keltiredi nemese ólimge ákeledi. Úıdegi dári-dármek qobdıshasynda saqtalatyn dárilerdiń jaramdylyq merzimin tekserýdi ádetke aınaldyryńyz. Kóbine olardyń sol jerde jatyp merzimi ótedi. Saqtaý sharttaryna erekshe nazar aýdaryńyz. Keıbir dári-dármek durys saqtalmaǵan jaǵdaıda jaramdylyq merzimi qysqarady, — delingen habarlamada. 

Aıta keteıik, sońǵy 2 jylda dári-dári dármekti retseptisiz satý boıynsha 204 derek tirkelgen.