Qandastarmyz daıyndaǵan «Fýtbol áni» jastardy sportqa úndeıdi — sheteldegi qazaq baspasózi

Ózbekstanda elektromobıl satylymy eki esege jýyq ósti — ÓzA

Ózbekstanda elektromobılderge suranys jyl saıyn artyp keledi. Bul týraly Ekonomıkalyq zertteýler jáne reformalar ortalyǵynyń derekterinde aıtyldy.

Bul týraly osy aptada «ÓzA» aqparat agenttigi habarlady.

Málimetke sáıkes, 2026 jylǵy sáýirde respýblıka boıynsha 8,1 myń elektromobıl satylǵan. Bul kórsetkish ótken jyldyń osy kezeńimen salystyrǵanda eki esege jýyq joǵary.

Sarapshylardyń baǵalaýynsha, elektromobılder segmenti eldegi jeńil avtokólik naryǵynda eń joǵary ósim qarqynyn saqtap otyr.

Satylym kólemi boıynsha Tashkent qalasy kósh bastap tur. Munda 5,56 myńnan astam elektromobıl satylyp, bul el naryǵynyń shamamen 70 paıyzyn quraǵan.

Habarlamada aıtylýynsha, óńirler arasynda Tashkent oblysy men Ferǵana oblysy joǵary kórsetkishke ıe boldy. Atalǵan aımaqtarda tıisinshe 573 jáne 464 elektromobıl satylǵan.

Sonymen qatar, jyldyq esep boıynsha elektromobıl satylymy respýblıkanyń barlyq derlik óńirinde ósken. Tek Samarqand oblysynda naryq belsendiligi ótken jylmen salystyrǵanda 34 paıyzǵa tómendegeni baıqaldy.

Sondaı-aq osy aptada «ÓzA»-da «Azııa áıelderiniń II forýmynda Buhara deklaratsııasy qabyldandy» degen taqyryptaǵy aqparat jarııalandy.

Atalǵan BAQ-tyń málimetinshe, Buhara qalasynda «Áıelderge ınvestıtsııa — turaqty ósimniń negizi» taqyrybynda Azııa áıelderiniń II forýmy ótti. Іs-sharaǵa 20-dan astam memleket pen halyqaralyq uıymdardyń joǵary deńgeıdegi ókilderi, parlament depýtattary, sarapshylar men dıplomattar qatysty.

Shavkat Mırzıeev forým qatysýshylaryna quttyqtaý joldap, ony Prezıdent ákimshiliginiń basshysy Saıda Mırzıeeva oqyp berdi. Tanzıla Narbaeva Ózbekstanda genderlik teńdik pen áıelderdiń quqyqtaryn qorǵaý memlekettik saıasattyń negizgi baǵyttarynyń birine aınalǵanyn aıtty.

Forýmda klımattyń ózgerýi, kedeılik, teńsizdik máselelerin sheshýdegi áıelderdiń róli talqylandy. Sondaı-aq áıelderdi qoldaý, halyqaralyq yntymaqtastyqty keńeıtý jáne bilim, kásipkerlik, ınnovatsııa salalaryndaǵy múmkindikterdi arttyrý máselelerine nazar aýdaryldy.

Forým qorytyndysynda Buhara deklaratsııasy qabyldandy. Qujat Azııa elderi arasyndaǵy yntymaqtastyqty nyǵaıtýǵa, áıelderdi qoldaýǵa arnalǵan zańnamalyq jáne praktıkalyq tetikterdi jetildirýge baǵyttalǵan.

Qazaqstan men Qytaı birlesken astyq saýda platformasyn qurady — Eurasia Today

Qazaqstan men Qytaı «Bir beldeý, bir jol» aıasynda birlesken astyq saýda platformasyn qurý týraly kelisimge keldi. Joba astyq saýdasyn tsıfrlandyrýǵa jáne eki el arasyndaǵy agrarlyq yntymaqtastyqty nyǵaıtýǵa baǵyttalǵan.

Bul týraly Bishkekte shyǵatyn «Eurasia Today» aqparat agentti habarlady.

Atalǵan BAQ-tyń málimetinshe, Aýyl sharýashylyǵy vıtse-mınıstri Ermek Kenjehanuly men QHR Azyq-túlik jáne strategııalyq rezervter jónindegi memlekettik basqarmasynyń basshysy Lıý Hýansın kezdesýi barysynda tıisti qujattarǵa qol qoıyldy. Atap aıtqanda, eki vedomstvo arasyndaǵy memorandým jáne ulttyq astyq operatorlary arasyndaǵy seriktestik kelisimi bekitildi.

Taraptar agrarlyq saýda kóleminiń ósip otyrǵanyn atap ótti. Ótken jyly eki el arasyndaǵy aýyl sharýashylyǵy ónimderiniń saýdasy 36,8 paıyzǵa ósip, 1,97 mlrd dollardy quraǵan. Al bıylǵy jyldyń birinshi toqsanynda kórsetkish taǵy 61,7 paıyzǵa artyp, 697 mln dollarǵa jetti.

Qytaı tarapy Qazaqstandy azyq-túlik qaýipsizdigi men turaqty jetkizý tizbegin qamtamasyz etýdegi mańyzdy seriktes retinde baǵalap, astyq saýdasy men logıstıka salasyndaǵy yntymaqtastyqty odan ári keńeıtýge daıyn ekenin bildirdi.

Qytaı medıtsınasynyń Qazaqstandaǵy alǵashqy oqý ortalyǵy ashyldy — Halyq gazeti

Gýandýn qytaı medıtsınasy aýrýhanasy Almatydaǵy Ortalyq aýrýhanamen kelisimge kelip, Qazaqstan aýmaǵynda Ortalyq Azııadaǵy alǵashqy mamandandyrylǵan oqý ortalyǵyn ashty, dep jazady «Halyq gazeti».

Qytaılyq BAQ-tyń málimetinshe, jańa ortalyq omyrtqa baǵanasyna mınımaldy ınvazıvti hırýrgııa jasaý jáne qytaı medıtsınasynyń reabılıtatsııalyq ádisterin oqytýǵa baǵyttalǵan.

Qytaılyq mamandar tórt kúrdeli operatsııany kórsetip, «mınımaldy ınvazıvti hırýrgııa + dástúrli reabılıtatsııa» modelin tanystyrdy. Bul tásil naýqastardyń statsıonarda emdelý merzimin shamamen 30 paıyzǵa qysqartatyny aıtyldy.

Joba aıasynda aldaǵy úsh jylda omyrtqa hırýrgııasy salasynda 50 qazaqstandyq dárigerdi daıarlaý josparlanǵan. Mamandar bul bastama qytaı medıtsınasynyń óńirde qoldanylýyn keńeıtip, jergilikti tájirıbege beıimdelýine jol ashatynyn atap ótti.

Sonymen qatar osy aptada Halyq gazeti basylymynda «Qytaı men Qazaqstan arasyndaǵy shekaralyq qoıma keńeıip jatyr» degen mazmundaǵy aqparat jaryq kórdi. 

Atalǵan BAQ-tyń deregine súıensek, Shyńjań óńiriniń Tarbaǵataı aımaǵynda Qytaı men Qazaqstan arasyndaǵy shekaraaralyq elektrondyq kommertsııaǵa arnalǵan qoıma kesheni keńeıtilýde. Joba týraly «Halyq Gazeti» habarlady.

Joba sheńberinde ımport-eksport taýarlaryna arnalǵan shekaralyq qoımanyń II kezeńi iske asyrylyp jatyr. Ol EPC+O modeli boıynsha júzege asýda jáne shamamen 26,5 mln ıýan ınvestıtsııany qamtıdy. Qurylys aýmaǵynda eki qoıma jáne qosalqy ınfraqurylym salynady.

Josparǵa sáıkes, qurylys 2026 jyldyń sáýirinde bastalyp, qazan aıynda aıaqtalady. Joba Qytaı men Qazaqstan arasyndaǵy shekaralyq elektrondyq saýdany damytýǵa jáne logıstıkalyq ınfraqurylymdy kúsheıtýge baǵyttalǵan.

Irandyq ǵalymdar omyrtqaaralyq dıskini emdeýge arnalǵan jańa gıdrogel jasady — ParsToday

Amırkabır tehnologııalyq ýnıversıtetiniń zertteýshileri omyrtqaaralyq dısk degeneratsııasynan týyndaıtyn arqa aýrýyn emdeýge arnalǵan ınektsııalyq, ózin-ózi qalpyna keltiretin gıdrogel jasap shyǵardy. Bul týraly ParsToday agenttigi habarlady. 

Ǵalymdardyń aıtýynsha, hıtozan men jelatın negizinde ázirlengen gıdrogel qabynýǵa qarsy tselekoksıb preparatyn jetkizý arqyly omyrtqaaralyq dısk ıadrosyn qalpyna keltirýge kómektesedi. Joba avtorlary bul ádis arqa aýrýyn emdeýdiń mınımaldy ınvazıvti ári tıimdi tásili bolýy múmkin ekenin aıtady.

Zertteýshi Márııam Nezadıniń sózinshe, arqa aýrýy álemdegi múgedektiktiń eń keń taralǵan sebepteriniń biri sanalady. Ol omyrtqaaralyq dıskiniń zaqymdanýy men jaryǵyn aýrýdyń negizgi sebepteri retinde atap ótti.

Ǵalymdar jańa tehnologııanyń artyqshylyqtary retinde onyń tómen ınvazıvtiligin, qoldanýdyń qarapaıymdylyǵyn jáne tinderdi qalpyna keltirý múmkindigin atady. Olardyń málimetinshe, naryqta Discogel atty uqsas ónim bar, alaıda onyń qabynýǵa qarsy jáne tinderdi qalpyna keltirý fýnktsııalary joq.

Qandastarymyz daıyndaǵan Shyńjań sýperlıgasyna arnalǵan «Fýtbol áni» jaryqqa shyqty — Altaı aqparaty

Shyńjań fýtbol sýperlıgasy aıasyndaǵy 2026 jylǵy «Tilektester kýbogyna» arnalyp, arnaıy «Fýtbol áni» atty jańa sporttyq taqyrypta týyndy ázirlenip jatyr. Bul týraly jergilikti shyǵarmashylyq ujym ókilderi málimdedi, dep habarlaıdy Altaı aqparaty.

— Atalǵan mýzykalyq shyǵarmany oblystyq án-bı tobynyń mýzykanty Baǵdat Sansyzbaıuly jazyp, aranjırovka jasaýda. Jobaǵa sondaı-aq ánshiler Nurshat Nurashuly men Serikbek Tursynǵazy qatysyp, shyǵarmany oryndaý jumystary josparlanǵan. Al bı qoıylymyn oblystyq án-bı tobynyń horeografy Lına Ábdireshıt daıyndaýda, dep jazdy qytaılyq BAQ.

Joba avtorlarynyń aıtýynsha, «Fýtbol áni» fýtbol sportynyń rýhyn, birlik pen komandalyq yntymaqty nasıhattaýǵa baǵyttalǵan. Sondaı-aq týyndy Altaı aımaǵyndaǵy ótetin matchtarynyń mádenı baǵdarlamasynyń bir bóligi retinde usynylady.

Mýzykalyq kompozıtsııa arqyly sporttyń tartymdylyǵyn arttyrý, jastardy salaýatty ómir saltyna baýlý jáne jergilikti fýtbol mádenıetin damytý kózdelip otyr. Shyǵarmashylyq top ánniń mazmuny men sahnalyq qoıylymyn fýtbol alańynyń atmosferasymen úılestirýge basa mán bergen.

Qazirgi ýaqytta týyndyny jetildirý, vokaldyq oryndaý men horeografııalyq qoıylymdy daıyndaý jumystary qarqyndy júrgizilýde. Joba tolyq aıaqtalǵannan keıin ol Shyńjań sýperlıgasynyń Altaıda ótetin oıyndarynda kópshilikke usynylmaq.

Aıta keteıik, 17 mamyr kúni 2026 jylǵy «Tilektester kýbogy» dep atalatyn Shyńjań fýtbol sýperlıgasy birlesken jarysynyń Soltústik Shyńjań óńirindegi kezekti týr oıyndary Altaı qalasynda jalǵasyn tapqan bolatyn. Bul kezeńde Altaı quramasy óz alańynda Sanjy komandasyn qabyldap, tartysty kezdesýde 1:0 esebimen jeńiske jetti. 

Shińgil aýdanynda kóktemgi qar jaýyp, óńir aq mamyqqa orandy — Jenmın jıbao

Shyńjańnyń Altaı aımaǵyna qarasty Shińgil aýdanynda kóktem mezgilinde qar jaýyp, tabıǵat erekshe kóriniske endi, dep habarlaıdy Qytaıdyń «Jenmın jıbao» aqparattyq portaly.

Atalǵan basylymnyń málimetinshe, 19 mamyrǵa qaraǵan túni jaýǵan qardan keıin endi ǵana kókteı bastaǵan taýly alqaptar men aýyl mańyndaǵy jasyl jelek appaq qarmen kómkerildi. Kóktemgi jylymyqqa endi beıimdelip kele jatqan tabıǵat bir sátte qysqy kóriniske qaıta oralyp, óńirde aıryqsha landshaft qalyptasty.

Tabıǵat qubylysy ásirese Chıńluńhý kóli mańynda anyq baıqaldy. Kól beti tumanǵa oranyp, aınalasy tynysh qar astynda qalyp, kóktem men qystyń erekshe úılesimin kórsetti. Sondaı-aq aýdan ortalyǵyndaǵy kósheler men úıler de qar basyp, kóktemniń tosyn syıyndaı áser qaldyrdy.

Jergilikti turǵyndardyń aıtýynsha, kóktem sońynda mundaı qardyń túsýi sırek kezdesetin qubylys bolyp sanalady. Tabıǵattyń tosyn minezi óńirdiń kórkem kelbetin aıqyndap, erekshe fotosýrettik kórinis qalyptastyrǵan.

Túrik ashanasy aptalyǵy Túrkııanyń mádenı murasyn nasıhattaıdy — TRT

Túrkııa Respýblıkasy Prezıdenti apparaty janyndaǵy Kommýnıkatsııa basqarmasynyń basshysy Býrhanettın Dýran Túrik ashanasy aptalyǵynyń Túrkııanyń baı mádenı jáne órkenıettik murasyn álemge tanytýdaǵy mańyzyna toqtaldy. Bul týraly TRT habarlady.

Onyń aıtýynsha, bıyl besinshi ret uıymdastyrylyp otyrǵan Túrik ashanasy aptalyǵy «Bir dastarhandaǵy mura» taqyrybymen ótýde. Іs-shara Emıne Erdoǵannyń qamqorlyǵymen uıymdastyrylǵan.

Atalǵan BAQ-tyń keltirgen málimetterine súıensek, Býrhanettın Dýran Anadoly jeriniń dástúrli taǵamdary ǵasyrlar boıy qalyptasqan mádenı qundylyqtarmen birge nasıhattalyp jatqanyn atap ótti.

— Bir ulttyń jady keıde bir halyq áninde, keıde bir dastarhan basyna jınalǵan adamdardyń júreginde saqtalady, — dedi ol.

Sondaı-aq Dýran túrik ashanasy tek taǵam mádenıeti ǵana emes, qonaqjaılyqtyń, bólisýdiń, bereke men mádenı sabaqtastyqtyń sımvoly ekenin aıtty.

Ol atalǵan bastamany júzege asyrýǵa atsalysyp júrgen aspazdarǵa, óndirýshilerge jáne ulttyq mádenı murany keler urpaqqa jetkizýge eńbek etip júrgen barlyq azamattarǵa alǵys bildirdi.