Qandasymyz Erkebulan Baıytuly álemdik arenada top jardy - sheteldegi qazaq baspasózi
Kazinform halyqaralyq aqparat agenttigi sheteldegi qazaq tilinde taraıtyn aqparat kózderine aptalyq sholýyn usynady.
Shyńjańdaǵy mektepterde ózgeshe oqý tásili jolǵa qoıyldy - CNR
Shyńjańnyń oqý-aǵartý salasyndaǵy dene tárbıesi pánindegi sabaq mazmuny keńeıtilý ústinde. Atalǵan ólkede dene tárbıesi sabaǵynyń oqytý formasy ár óńirde ózge jerlermen salystyrǵanda ózindik erekshelikke ıe, - dep habarlaıdy Qytaıdyń «Ortalyq halyq radıosy» aqparattyq portaly.
Atap aıtqanda, Altaıdaǵy orta, bastaýysh mektep oqýshylarynyń qysqy dene tárbıesi sabaǵy shańǵy alańynda ótedi. Sonymen qatar 2019 jyldan bastap Altaı qalasy «At ónerin mektep aýlasyna engizý» jobasyn jalpylastyryp, saýattyq bilimderin úıretip, oqýshylardy atqa mingizý arqyly atalǵan ónerdiń ózgeshe qasıetin sezindirgen. Al, Qaramaıly qalalyq №8 bastaýysh mektep dene tárbıesi sabaǵynda «qalqymaly tárelke ushyrý» dep atalatyn sporttyq sabaǵyn jalǵastyrýda.
Qytaılyq BAQ-tyń dereginshe, qazirgi ýaqytta Shyńjańda joǵarydaǵy atalǵan dene tárbıesi sabaǵynan tys, ózgeshe erekshelikke ıe sabaq túrleri júrgizilip jatyr. Atap aıtar bolsaq, jaqynda Shyhyzy ýnıversıtetinde júzim sharabyn saraptaý sabaǵy ótken. Bul sabaq jeli qoldanýshylarynyń qyzý talqysyna tústi. Sondaı-aq Shyhyzy ýnıversıteti azyq-túlik kolledjiniń tájirıbe sabaǵynda shákirtter sıyr eti buqtyrmasyn jasaýdy úırenip, sabaq barysynda dámdi taǵamnan dám tatýmen birge azyq-túlik bilimderin qosa ıgergen.
«CNR»-diń málimetinshe, qazirge deıin orta, bastaýysh mektepterde shańǵy tebý, at óneri sabaǵy jalpylastyrylsa, endi Shyńjań pedagogıka ýnıversıteti stýdentterge sadaq atý ónerin úıretý sabaǵyn engize bastaǵan.
Ózbekstan bıyl 198 elmen saýda baılanysyn jasady - «ÓzA»
2023 jyldyń qańtar-qazan aılarynda Ózbekstan álemniń 198 elimen saýda baılanysyn jasady. Osy arlyqta Ózbekstan Respýblıkasynyń syrtqy saýda aınalymy 51 mıllıard AQSh dollaryna jetti. Bul týraly osy aptada ózbekstandyq «ÓzA» aqparattyq agenttigi jazdy.
Atalǵan basylymnyń málimetinshe, ótken jyldyń sáıkes kezeńimen salystyrǵanda syrtqy saýda aınalymynyń kólemi 25,2 paıyzǵa ósken. Ózbekstan syrtqy saýda aınalymynda Qazaqstan baılanysy edáýir joǵary úsh eldiń biri. Atap aıtar bolsaq, Qytaı (21,2 paıyz), Reseı (15,6 paıyz), Qazaqstan (7 paıyz).
Erkebulan Baıytuly álemdik arenada eki birdeı júlde jeńip aldy – facebook
62 eldiń úzdik sportshylary qatysqan Astanada ótken chempıonatta Mr.olimpia amateur qualifier. Astana IFBB PRO 2023 saıysynda (Mensphysique Novice kategorııasynda) altyn medaldy Mońǵolııa elinde turatyn Erkebulan Baıytuly atty sportshy qandasymyz jeńip aldy. Sonymen qatar osy sporttyń Mensphysique Open Class D túrinen qola medaldy taǵy qanjyǵasyna baılaǵan. Bul týraly úzdik sportshynyń Mońǵolııada turatyn ákesi aqyn Baıyt Qabanuly facebook-tegi paraqshasynda jazdy.
Jazba avtory bul Astana qalasynda bolyp jatqan álemdik deńgeıdegi asa bedeldi sporttyq shara ekenin aıtady.
Aqyn Baıyt Qabanuly balasynyń Astanaǵa barǵanda aldynan kútip alyp, úıine jatqyzyp, barlyq jaǵdaıyn jasaǵan Ularbek Dáleıulyna jáne onyń otbasyna rızashylyǵyn bildirgen.
130 mıllıon jyl buryn ómir súrgen dınozavr terisiniń keı bóligi 100 paıyz saqtalǵan – «Halyq gazeti»
Qytaı ǵalymdary 130 mıllıon jyl buryn ómir súrgen dınozavr terisiniń qaldyqtaryn tapty, dep habarlaıdy Qytaıdyń «Halyq» gazeti aqparattyq portaly.
Atalǵan BAQ-tyń kelitirgen málimetterine súıensek, jaqynda Qytaıdyń Shandýn ólkesindegi ǵalymdardyń zertteý toby 130 mıllıon jyl burynǵy Hebeı ólkesiniń Chende qalasy Fennın Manchjýr avtonomııalyq aýdanynda tabylǵan Jehol Biota shópqorekti dınozavrlardyń eki qazbasyn qazyp, qalpyna keltirdi.
«Halyq» gazetiniń dereginshe, súıekter men teri qaldyqtarynyń keıbir bóligi shamamen 100 paıyz saqtalǵan. Zertteý toby qazbanyń negizgi bóligin qalpyna keltirýdi aıaqtap, kezeńdik nátıjelerge qol jetkizgen.
Men armandaǵan Qazaqstan - «Parstoday»
Osy aptada Irannyń «Parstoday» aqparat agenttiginde «Men armandaǵan Qazaqstan» degen taqyryptaǵy maqala jaryq kórgen.
Atalǵan maqalanyń avtory ál-Farabı atyndaǵy Qazaq ulttyq ýnıversıtetiniń daıyndyq fakýltetinde bilim alyp júrgen stýdent.
Fakýltet túlegi Mońǵolııa elinen kelgen eken. Avtordyń aıtýynsha, ol Mońǵolııadaǵy barlyq joǵarǵy oqý oryndaryn uzaq saraptaǵan, biraq tańdaýy atalǵan elden emes, nazary atamekeni QR-daǵy ál-Farabı atyndaǵy Qazaq ulttyq ýnıversıtetine toqtaǵan.
«Qazirgi ál-Farabı atyndaǵy Qazaq Ulttyq ýnıversıtetine túsý árbir túlektiń armany bolǵany anyq. Sebebi ol aldyńǵy qatarly oqý oryndardyń biri de biregeıi. Bıyl oqýǵa grant arqyly túsýdi maqsat etip júrgen jas tyńdaýshylardyń birimin. Qazirgi tańda Qazaq Ulttyq ýnıversıtetiniń daıyndyq fakýltetinde bilim alyp júrmin», - dep jazdy daıyndyq fakýltetiniń túlegi.
Taklamakan shólindegi qumdar topyraqqa aınalatyn boldy - «People.cn»
Jaqynda Shyńjańdaǵy Taklamakan shóliniń kindigindegi Chershen aýdanyndaǵy «qumdy topyraqqa aınaldyrý» eksperımenttik demonstratsııalyq jobasy aıasynda 4 aılyq jumystan keıin bóriquıryq shóbin synaq retinde otyrǵyzý sátti bastaldy. Bul bastama «qumdy topyraqqa aınaldyrý» ekologııalyq qalpyna keltirý tehnologııasyn engizýge berik negiz qalady, dep jazady kaz.people.cn.
Qytaılyq basylymnyń málimetinshe, qumdy shólge otyrǵyzylǵan bóriquıryq shóbi kún uzaq túsetin ortaǵa ósýge beıim. Ol aıazǵa, ylǵalǵa óte tózimdi bolǵandyqtan maldyń jem-shóbi, qumdy tizgindeıtin ósimdik retinde paıdalanýǵa bolady. Qummen kúresýde jáne qorshaǵan ortany qalpyna keltirýde bóriquıryq shópteriniń ıntegratsııalanǵan múmkindikterin tolyq paıdalanýdy jalǵastyrady jáne Chershen aýdanyndaǵy qumdy shóldiń topyraqqa aınalýyna jańa jol tabatyn kórinedi.
Aıta keteıik, Taklamakan shóli – Batys Qytaıda ornalasqan shóldi dala. Álemdegi eń úlken ári eń uzyn shólderdiń biri. Batystan shyǵysqa deıingi aralyǵy 1 000 km. Eni - 400 km. Jalpy qumnyń aýdany - 300 myń km² quraıdy.
Jalpy, Taklamakan shóli álemde Sahara shólinen keıingi 2-shy orynda turǵan qumdy dala.
Ilber Ortaılyǵa EUÝ ýnıversıtiniń Qurmetti profesory ataǵy berildi – «TRT»
Qazaqstannyń bas qalasy Astanada «Túrkııa Respýblıkasynyń 100 jyldyq belesinen Túrki áleminiń bolashaǵyna» taqyrybynda halyqaralyq konferentsııa ótkizildi. Bul týraly Túrkııa Radıo Televızııa portaly habarlady.
Atalǵan basylymnyń dereginshe, Túrki Akademııasy L.N. Gýmılev atyndaǵy Eýrazııa ulttyq ýnıversıteti jáne Túrkııa Respýblıkasynyń Elshiligimen birlesip uıymdastyrǵan sharanyń ashylýynda Túrki Akademııasynyń prezıdenti Shahın Mustafaev, Túrkııa Respýblıkasynyń Qazaqstan Respýblıkasyndaǵy Tótenshe jáne ókiletti elshisi Mustafa Kapýdjý, Halyqaralyq Osmanly zertteýleri komıtetiniń Basqarma keńesiniń múshesi professor Ilber Ortaıly sóz sóılegen.
Jıyn aıasynda Túrki Akademııasy belgili túrik tarıhshysy Afet Inannyń «Kemal Atatúrikti eske alǵanda» atty kitabynyń tusaýkeser rásimi ótti.
Jańa kitapta túrik zııaly qaýymynyń kórnekti ókili Afet Inan hanymnyń túrki áleminiń uly qaıratkeri, Túrkııa Respýblıkasynyń negizin qalaýshy Mustafa Kemal Atatúrik týraly estelikteri men oılary jınaqtalǵan.
Konferentsııa sońynda professor Ilber Ortaılyǵa Túrki áleminiń yntymaqtastyǵyn arttyrýdaǵy úlesi úshin Túrki Akademııasynyń arnaıy medali tabystalyp, L.N.Gýmılev atyndaǵy EUÝ ýnıversıtiniń Qurmetti profesory ataǵy berildi.
