Qanat Taımerdenov Almatydaǵy oqıǵa jaıynda: Polıtsııa qyzmetkerlerin uryp-soǵyp, mazaq qyldy

NUR-SULTAN. QazAqparat – Búgin Ortalyq kommýnıkatsııalar qyzmetinde Almaty qalalyq Polıtsııa departamentiniń bastyǵy Qanat Taımerdenov polıtseıler nelikten qarý qoldanbaı, sheginýge májbúr bolǵanyn aıtty, dep habarlaıdy QazAqparat tilshisi.

«Shekteýli keńistikti jáne ákimdiktegi adamdardyń tyǵyzdyǵyn eskere otyryp, polıtsııa qyzmetkerleri qarýdy qoldanbady. Óıtkeni kóptegen adam shyǵynyna ákelýi múmkin edi. Osyǵan baılanysty polıtseıler qarý qoldanbaı, sheginýge májbúr boldy. Shabýylshylar ákimshilikti tonaý, órteý arqyly dúnıe-múlkin búldire bastady», - dedi Qanat Taımerdenov.

Onyń aıtýynsha, polıtsııa qyzmetkerleri men áskerı oqý ornynyń kýrsanttaryn uryp-soǵyp, mazaq qylyp, arnaıy quraldary men kıimderin tartyp alǵan.

«Dál osy ýaqytta qalanyń ár jerinde sodyrlardyń kóptegen toptary polıtsııa jasaqtaryna oq jaýdyryp, qalany qıratýǵa kiristi», - dedi Polıtsııa departamentiniń bastyǵy.

Aıta keteıik, 5 qańtar kúni tańerteń Almatyda qala ortalyǵyna bir mezgilde 20 myń adam jınaldy.

Odan keıin Respýblıka alańyna jınalǵan myńdaǵan shabýylshylar ákimdik ǵımaratyn basyp alýǵa taǵy da árekettengen.