Qanat Bozymbaev EAEO-da ortaq energetıkalyq naryq qalaı qurylatynyn túsindirdi
Mınıstrdiń aıtýynsha, ortaq energetıkalyq naryqta biryńǵaı retteýshi organ bolmaıdy. Árbir memleket óz júıesin saqtaı otyryp, ózara tıimdi yntymaqtastyqty júrgizetin bolady.
«Bizge 2025 jylǵa deıin daıyn bolý kerek. Eń bastysy, barlyq sharalar teń dárejede atqarylady. Máselen, reseılik kompanııalar Qazaqstanǵa kelse, otandyq kásiporyndarǵa qandaı tarıf berilse, olarǵa da sondaı tarıf beriledi. Sol sııaqty qazaqstandyq kompanııalar Reseı naryǵyna kirse, olarǵa da týra sondaı jaǵdaı jasalady. Bir sózben aıtqanda, árbir memleket óz zańnamasyna súıenedi. Ortaq naryq bolsa da, biryńǵaı retteýshi bolmaıdy. Eýrazııalyq ekonomıkalyq odaqqa múshe árbir eldiń energetıkalyq júıesi qala beredi. Al ortaq naryq aıasynda birlesip jumys isteýdiń qaǵıdattary bolady», - dedi Q.Bozymbaev búgin Astanada ótken jıynda.
Aıta keteıik, aǵymdaǵy jyly mamyr aıynda Eýrazııalyq ekonomıkalyq odaqta ortaq energetıkalyq naryqty qurýǵa arnalǵan xattama rásimdeledi. Atalǵan shara EAEO týraly kelisimsharttyń bes jyldyǵyna oraı uıymdastyrylady.
«Hattama naryqty qurý kezeńderin retteıtin bolady. Negizi, atalǵan qujattyń keıbir tarmaqtary boıynsha áli kúnge deıin qyzý talqylaý júrip jatyr. Máselen, Qazaqstan men Reseıdiń arasynda birqatar máseleler boldy. Degenmen, biz onyń bárin rettep aldyq. Sosyn eksport pen ımportpen aınalysatyn arnaıy uıymdy qurýǵa qatysty mańyzdy bir másele boldy. Qazaqstanda kez kelgen kompanııa ruqsat alyp, energııany ekspotqa shyǵara alady, ımport jasaýǵa da bolady. Al Reseıde ondaı jumyspen arnaıy uıymdar aınalysady. Osynyń úlgisinde árbir memlekette arnaıy uıymdy qurý máselesi kóterilgen bolatyn. Biraq biz óz pozıtsııamyzdy qorǵaı aldyq. Eksport pen ımportty monopolızatsııalaýdyń qajeti joq dep sanaımyz», - deıdi Q.Bozymbaev.
