Qanat Bozymbaev Mańǵystaý oblysyndaǵy kópjyldyq máselelerdi sheshýge qatysty birqatar tapsyrma berdi
ASTANA. KAZINFORM — Mańǵystaý oblysyna jumys sapary barysynda Qanat Bozymbaev Aqtaý qalasynyń birqatar negizgi ınjenerlik jáne ınfraqurylymdyq nysandaryn aralady.
Vıtse-premer KOS-2-niń 2-shi kezeńi qýattylyqty táýligine 30 myń m3-ten táýligine 70 myń m3-ke deıin jetkizý qurylysymen tanysty. Nysan 2025 jyly paıdalanýǵa beriledi. Sodan keıin Qanat Bozymbaev qalanyń magıstraldyq jylý jelilerin qaıta jańartýdy qarady: jobaǵa saı 2024-2026 jyldar aralyǵynda ákimdik 47 km-den 44 km magıstraldyq jylý qubyryn kezeń-kezeńimen aýystyrýdy josparlap otyr.
Ári qaraı vıtse-premer Munaıly, Qaraqııa, Túpqaraǵan aýdandarynyń turǵyndaryn sýmen qamtamasyz etetin «Kaspıı» sý tuşytý zaýytynda boldy. Búgingi tańda munda aýyz sýdyń ónimdiligin táýligine 20 myńnan 40 myń m3-ke deıin arttyrý boıynsha jumystar júrgizilip jatyr. Іske qosý-jóndeý jumystary osy jyldyń qyrkúıegine deıin aıaqtalady.
Kelesi nysan «QazAzot» AQ boldy. Onda KazAzot Prime jańa ammıak-karbamıd keshenin salý jobasy tanystyryldy. Jańa zaýyt 700 turaqty jumys ornyn qura otyryp, aýyl sharýashylyǵynda qoldanylatyn Azotty tyńaıtqyshtar shyǵarady. Sondaı-aq, vıtse-premer «MAEK» JShS-de boldy. Óńirde sý tapshylyǵyn azaıtý úshin kásiporyn aýmaǵynda ónimdiligi táýligine 24 myń m3 sý tuşytý qondyrǵylaryn salý josparlanyp otyr.
Nysandardy aralaý qorytyndysy boıynsha Qanat Bozymbaev Mańǵystaý oblysynyń áleýmettik-ekonomıkalyq damýynyń shuǵyl sharalaryn ázirleý boıynsha keńes ótkizdi. Júrgizilip jatqan jumystar týraly oblysqa kelgen Ulttyq ekonomıka, energetıka, qurylys jáne ónerkásip, ekologııa jáne tabıǵı resýrstar vıtse-mınıstrleri esep berdi. Mańǵystaý oblysy boıynsha tirshilikti qamtamasyz etýdiń barlyq salasyn qamtıtyn 2024-2027 jyldarǵa barlyǵy 118 ınstıtýtsıonaldyq joba josparlanǵan. Bul – ekonomıkany ártaraptandyrý, tamaq ónerkásibin damytý, halyqty aýyz sýmen 100% qamtamasyz etý, jylý jelileriniń tozýyn azaıtý, ınternet jelileriniń qamtylýy men sapasyn arttyrý.
Vıtse-premer óńirdiń ekologııalyq problemalaryna jeke toqtalyp, Jańaózen qalasyndaǵy QTQ stıhııalyq qoqys úıindisiniń buzylǵan jerlerin rekýltıvatsııalaýdy jedeldetýdi, sondaı-aq «Qoshqar ata» qaldyqtar qoımasyn rekýltıvatsııalaýdy aıaqtaýdy tapsyrdy. Sonymen qatar Qanat Bozymbaev aýdandardaǵy, Jańaózen qalasyndaǵy joldardyń sapasyzdyǵyn atap ótip, beıindi Mınıstrlikke tıisti tapsyrmalar berdi. Áleýmettik salaǵa erekshe nazar aýdaryldy: oblys halqynyń áleýmettik osal toptary úshin jalǵa beriletin turǵyn úı satyp alý, Jańaózen qalasynda 18 páterli turǵyn úı salý, Beıneý aýdanynda 200 oryndyq jataqhanasy bar 600 oryndyq kolledj salý.
«Bilim berý salasynda óte mańyzdy másele týyndap otyr. Bıyl 13 mekteptiń qurylysy aıaqtalyp, kelesi jyly taǵy 8 mektep tapsyrylady. Kadrlar qajet. Óńirde oqytýshylar men dárigerlerdiń tapshylyǵy baıqalady. Óńir úshin qajetti mamandardy daıarlaý –strategııalyq másele. Muqııat taldaý júrgizýdi jáne osy baǵytta ýnıversıtettermen jumys isteýdi tapsyramyn. Biz jergilikti daryndy jastar men balalardy qoldaýymyz kerek. NZM, RFMM, Daryn jáne Bilim-ınnovatsııa lıtseıi sııaqty mektepterde oqýǵa kvotalardy ulǵaıtýymyz kerek. «Qazmunaıgaz» kompanııasy elimizdiń jetekshi mektepterine 1000-nan astam talantty balany oqytýǵa jiberýge daıyn. Al óńirge dárigerlerdi tartý máselesin turǵyn úımen sheshý qajet», - dedi Qanat Bozymbaev.
Vıtse-premer Mańǵystaý oblysyna sapary barysynda, áleýmettik-ekonomıkalyq damýdyń shuǵyl sharalar josparyna tolyqtyrýlar engizýge bir apta merzim berdi.
