Qanat Bozymbaev Aqmola oblysyndaǵy sý tasqynyna qarsy jumystardyń barysyn tekserdi
ASTANA. KAZINFORM - Sý tasqynyna qarsy is-sharalardy úılestirý jáne sý tasqyny kezeńiniń zardaptaryn joıý jónindegi respýblıkalyq shtab basshysynyń orynbasary, vıtse-premer Qanat Bozymbaev pen tótenshe jaǵdaılar mınıstri Shyńǵys Árinov Aqmola oblysynyń sý basý qaýpi bar aımaqtaryn aralap kórdi.
QR Úkimeti baspasóz qyzmetiniń habarlaýynsha, Premer-Mınıstrdiń orynbasary, tótenshe jaǵdaılar mınıstri jáne Aqmola oblysynyń ákimi elorda mańyndaǵy aýdandardaǵy Nura, Esil ózenderi basseınderindegi sý aǵynyn tekserdi. Sý tasqynynyń ekinshi kezeńiniń bastalýyna baılanysty oblystaǵy jaǵdaı turaqty túrde kúrdeli dep baǵalanýda.
Nura, Esil, Jabaı jáne Kolýton táýlik boıy ózenderiniń sý deńgeıin baqylaý úshin beketter quryldy. Muz keptelisteri qalyptasqan kezde olardy joıý úshin jarý jumystary júrgiziledi. Óńirge Astana qalasy ákimdigi men elordalyq uıymdardyń arnaıy tehnıkasy jiberilip, TJM jáne QR Azamattyq qorǵanys akademııasynyń kúshteri qaıta ornalastyryldy.
Sý tasqynyna qarsy is-sharalar kesheni Jibek Joly aýylynda belsendi túrde iske asyrylýda. Eldi mekendi qorǵaý úshin ınertti materıaly bar qapshyqtar daıyndalyp, 2300 metr qorǵanys úıindisin nyǵaıtý jáne kúsheıtý jumystary júrgizilýde.
Sapar Tselınograd aýdany R. Qoshqarbaev aýylynda ornalasqan Nura ózeniniń gıdroposttaryn aralaýmen jalǵasty. Vıtse-premerge erigen qarǵyn sý qozǵalysynyń jaǵdaıy týraly baıandaldy. Gıdroposttarda táýlik boıy baqylaý júrgiziledi. 3 sáýirdegi jaǵdaı boıynsha ózendegi sý deńgeıiniń tómendeýi baıqalady.
Qosshy qalasynyń Taıtóbe aýylynda uzyndyǵy 2400 metr topyraq úıindisi qorǵanysyn nyǵaıtý jumystary júrgizilýde. Tselınograd aýdanyndaǵy Qaraótkel, Qarajar, Talapker aýyldarynda da sý tasqynyna qarsy is-sharalar tekserildi.
Shtab basshysynyń orynbasary oblys ákimi men TJD basshysyna elorda mańyndaǵy óńirlerde sý tasqynynan ótý máselesin jeke baqylaýǵa alýdy tapsyrdy. Sondaı-aq qaýip-qaterdi joıýǵa baǵyttalǵan birqatar tapsyrma berildi.
Aqmola oblysy boıynsha sý tasqynyna qarsy is-sharalarǵa barlyǵy 1500-ge jýyq adam men 350 birlik tehnıka jumyldyryldy.
