Qanat Áýesbaı: «Atyraý» telearnasynda ekologııalyq mádenıetti nasıhattaıtyn habar ashýdy kózdep otyrmyz
« Joldaýda aıtylǵan qorshaǵan ortaǵa qatysty bul aspektilerdiń barlyǵy ekologııasy nashar Atyraýda turyp jatqan men úshin de asa mańyzdy. Osy oraıda Ekologııalyq kodeks jobasynyń jańa redaktsııasy túzilýi de quptarlyq. Sol arqyly elimizdegi ekologııalyq túıtkilderdiń birtalaıyn zańnamalyq turǵyda sheshýge jol ashylǵany qýantady , - deıdi «Qazaqstan» RTRK AQ Atyraý fılıalynyń dırektory, belgili jýrnalıst Qanat Áýesbaı. — Ekologııalyq qundylyqtar máselesiniń elimizde jıi aıtyla bastaýy - azamattyq qoǵam damýynyń aıqyn belgisi. Prezıdent bıologııalyq ártúrlilikti saqtaý men ratsıonaldy paıdalanýdyń uzaqmerzimdi jobasyn ázirleýdi tapsyrdy. Bul úshin aldaǵy bes jylda orman alqabynda 2 mıllıard aǵash, al eldi mekenderde 15 mıllıon aǵash otyrǵyzylatynyn Joldaýdan bilip otyrmyz. Tal-daraǵy seldir Atyraý úshin bul asa ózekti másele ekeni túsinikti. Jalpyulttyq sıpat alatyn bul aktsııa sátimen júzege asyp, elimizdi, onyń ishinde Atyraýdy kógaldandyrýǵa sep bolmaǵyna senemin» .
Qanat Áýesbaı, sonymen qatar, Prezıdent Joldaýyndaǵy ekologııalyq bilim berý men óskeleń urpaqty tárbıeleýge qatysty aıtylǵan sózder shyǵarmashylyq ıdeıa týyndaýyna túrtki bolǵanyn aıtady:
«Qoǵamda ekologııalyq qundylyqtardy dáripteýde aqparat quraldarynyń róli orasan zor ekeni belgili. Qorshaǵan ortaǵa janashyrlyqpen qaraýǵa negizdelgen ekologııalyq sanany qalyptastyrýdyń alǵysharty da sol bolmaq. Memleket basshysy da muny aıqyn túsinip otyr. Osy turǵyda biz, «Atyraý» telearnasynyń shyǵarmashylyq ujymymen aqyldasa kele, elimizdiń batys óńirindegi ekologııalyq máselelerdi kóterip, ekologııalyq mádenıetti nasıhattaıtyn «EKOqoǵam» habaryn ashýdy kózdep otyrmyz. Búgingi PrezıdentJoldaýynda ekologııaǵa qatysty aıtylǵan túıtkildiń barlyǵy da osy habardyń arqaýy bolmaq».
