Kanar araldary artyq týrızmge qarsy narazylyq bildirdi

ASTANA. KAZINFORM – Jeksenbi kúni Kanar araldary boıynsha on myńdaǵan adam artyq týrızm jáne onyń saldaryna qarsy narazylyq bildirýge shyqty. Eń tanymal araldardyń biri Tenerıfede ǵana kóshege 30 myńǵa jýyq sherýshi shyqty, dep habarlaıdy Euronews. 

Arhıpelag turǵyndary týrızmniń qorshaǵan ortaǵa jáne ózderiniń ál-aýqatyna, sonyń ishinde turǵyn úı baǵasynyń ósýine baılanysty keri áseri týraly aıtty.

«Biz, kanarlyqtar, jaıly ómir súrý úshin ketýge májbúr bolǵanymyz durys emes. Bizdi eshkim elemeıdi», - dep málimdedi olar.

Sherýshiler úkimettiń jaǵdaıdy elemeı, esh shara qoldanbaı otyrǵanyn aıtyp, Kanar araldarynyń ekonomıkalyq modeline túbegeıli ózgerister engizýdi talap etip jatyr.

Olar týrızmge emes, jaǵdaıdy osyndaı deńgeıge jetkizgen saıasatkerler men bıznesmenderge qarsy ekenin basa aıtady.

2023 jyly Kanar araldaryna shamamen 14 mln týrıst keldi, arhıpelagtyń óz halqy – 2 mln-nan astam adam. Bul rette týrızmnen túsetin tabys óńirdiń jalpy ishki óniminiń úshten birinen astamyna teń bolyp otyr.

Kanar araldary — Afrıkanyń soltústik-batys jaǵalaýynda, Atlant muhıtyndaǵy jeti janartaýlyq araldan turatyn arhıpelag.

Eske sala ketsek, osy jyldyń shilde aıynda Ispanııanyń Palma-de-Malorka qalasynda myńdaǵan belsendi týrızmge qarsy narazylyq sherýine shyqty.