«Qamqorshy AMANAT» qory qaryz jandardyń tabysyn arttyrýǵa kómektesedi
ASTANA. KAZINFORM - «AMANAT» partııasynyń «Qaryzsyz qoǵam» jobasyn júzege asyrý jumysy jalǵasýda. Byltyr sáýir aıynda bastaý alǵan jobada 100 myńnan astam adam qarjylyq saýatyn arttyrdy. Jobanyń ekinshi kezeńinde partııa «Qamqorshy AMANAT» qoryn quryp, agrarlyq kooperatıvter arqyly «Qaryzsyz qoǵam» túlekteriniń tabysyn arttyrýǵa nıetti.
Osy maqsatta «AMANAT» partııasy QR Qarjy naryǵyn retteý jáne damytý agenttigimen, «Halyk Bank» jáne «Bank Tsentr Kredıt» bankterimen tıisti memorandýmǵa qol qoıdy.
Óz kezeginde QR Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov partııa usynatyn barlyq is-sharalardy, halyqtyń qaryzyn azaıtyp, tabysyn arttyrý jónindegi bastamalardy belsendi qoldaıtynyn atap ótti.
«Agenttik qaryz máselesin retteý algorıtmin qabyldady. Jańa kezeńde qaryz alýshy aýyldarda, qalalarda, oblystarda ornalasqan aımaqtyq jobalyq keńsege júginip, qaryz máselesin retteý josparyn jasaı alady. Munda kóptegen qaryz alýshyny ońaltý olardyń tabys deńgeıine baılanysty ekenin túsinemiz. Sondyqtan, partııa usynǵan tabysty arttyrý jónindegi ekinshi kezeń azamattardyń qaryz deńgeıin tómendetip, resmı nesıelik aınalymǵa oralýyna kómektesedi», - dedi N. Ábdirahmanov.
Agenttikke problemalyq nesıesi bar adamdardy ońaltý tetigin ázirleý tapsyrmasy berilgen. Atap aıtqanda, qaryz alýshy 12 aı boıy kestege sáıkes kredıtterdi ótese jáne onyń merzimi ótken mindettemeleri 30 kúnnen aspasa, Kredıttik bıýro «Ońaltýdan ótý» mártebesin beredi dep kózdelgen. Osylaısha, qaryz alýshynyń jaǵymsyz kredıttik tarıhy jabylady jáne ýaqytyly tólemderi ǵana saqtalady. Bul adamdardyń qalypty sharttarmen nesıe alýy úshin jasalǵan.
Problemalyq nesıesi barlardyń tabysyn artyrý úshin «Qamqorshy AMANAT» aıasynda Jambyl oblysy Merki aýdanynda «Agrosaýat» atty alǵashqy ortalyq ashyldy. Bul ortalyqta tilek bildirýshiler teorııalyq bilim alyp qana qoımaı, aýyl sharýashylyǵynyń túrli baǵyty boıynsha tájirıbelik daǵdylardy ıgere alady. Qatysýshylar úshin tájirıbeli zerthanalar men jobalardy tolyq júzege asyrýǵa qajet barlyq qural qoljetimdi bolady.
«Merki aýdanyna jasalǵan skrınıng turǵyndardyń aýyl sharýashylyǵymen belsendi aınalysatynyn kórsetti. Halyqtyń 75,6% mal men qus asyraıdy, al 70,2% - qyzanaq, kartop jáne qııar ósiretin baqshalary bar. Alaıda, halyqtyń 1 paıyzy ǵana jeke qosalqy sharýashylyqtarynda ósirgen ónimdi satady. Ekonomıkada bul «joǵalǵan paıda» dep atalady. Qolda bar áleýetti 1% turǵyn ǵana paıdalanyp otyr. Al nesıe qarajatyna júrgizilgen zertteý aqshanyń turmystyq tehnıkaǵa, úı-jaıyn jaqsartýǵa jumsalǵanyn kórsetedi. ıAǵnı eshkim bıznes úshin nesıe almaǵan», - dedi «Qaryzsyz qoǵam» jobasynyń jetekshisi Aqmaral Bekmurzaeva.
Onyń aıtýynsha, «Qamqorshy AMANAT» qory jeke-qosalqy sharýashylyqtardy kooperatıvterge biriktirip qana qoımaı, mal men tuqym satyp alýǵa, mashına-traktor stansalaryn uıymdastyrýǵa, ónimdi sertıfıkattaýǵa jáne ótkizýge kómek kórsetetin, qaıta óńdeý jobalaryn damytatyn, ónim saqtaý qoımalaryn salýǵa yqpal etetin tutas ekojúıe qurýǵa múmkindik beredi.
Ekinshi deńgeıli bankter de halyqtyń nesıelenýi men tabysyn arttyrý máselesine beı-jaı qaramaıdy jáne mundaǵy qarjy sektorynyń mańyzdy rólin túsinedi. Ótken jyly «Halyk Bank» «Qaryzsyz qoǵam» oqytý jobasyna demeýshilik kórsetken edi.
«2023 jyly jeke tulǵalarǵa kredıt berý kólemi 25 paıyzǵa ósti. Bul kórsetkish negizinen 30 paıyzdan astam ósken tutynýshylyq qaryzdardyń ósýi esebinen quraldy. Parlamentte, qoǵamda halyqty nesıelendirý máselesi birneshe ret kóterildi, nesıeleý sharttaryn qatańdatý boıynsha zań jobasy ázirlendi. Jeke tulǵalardyń bankrottyq mehanızmi alǵash ret engizildi. Kóptegen problemaly qaryz alýshylar bankrottyqty qaryzdan qutylýdyń joly dep sanaıtyn. Bankrottyq máseleni túgel sheshpeıdi. Endi «Qamqorshy AMANAT» qoryn qurý arqyly qıyn nesıelik jaǵdaıyna tap bolǵan otandastarymyzǵa kómektese alamyz», - dedi «Halyk Bank» Basqarma tóraǵasynyń orynbasary Ertaı Sálimov.
Nesıesi bar adamdardy biriktirý jáne olarǵa bolashaqta aqsha tabýǵa múmkindik berý ıdeıasy qaryzdy birtindep óteýge ǵana emes, tapqan aqshalaryn únemdeýge jáne qarjylyq qor qalyptastyrýǵa da múmkindik beredi. Munyń bári saıyp kelgende, memlekettiń ál-aýqatyn nyǵaıtýǵa septigin tıgizedi.
«Bank Tsentr Kredıt» te el ekonomıkasynyń damýyna belsendi qatysady, biz kásipkerlikti damytý turǵysynan ekinshi orynda turmyz. Biz tutynýshylyq nesıege kóp basymdyq bermeımiz jáne ıpoteka, avto jáne bıznes sekildi maqsattarǵa kóbirek kóńil bólemiz. Shaǵyn jáne orta bıznestiń ekonomıkadaǵy úlesiniń ósýin óte mańyzdy dep sanaımyz. «Qaryzsyz qoǵam», «Qamqorshy AMANAT» jobalary bizdiń turaqty damý maqsattarymyzben úndes jáne aldaǵy ýaqytta kásipkerler sany arta túsedi dep úmittenemiz», - deıdi «Bank Tsentr Kredıt» vıtse-prezıdenti Anastasııa Ovsıannıkova.
