Qamkóńil qarttardy qýantý – asa saýapty is – áleýmettik qyzmetker
Jyl saıyn qazan aıynyń sońǵy jeksenbisinde áleýmettik qyzmetkerler kúni toılanady. Meıirim men adamgershilikti boıyna sińirgen mamandyq ıeleri qamqorlyqqa muqtaj jandardyń janynan tabylyp, turmys-tirshiligine qolǵabys jasap, ómirine etene aralasady. Іzgi qasıetterden bólek, birneshe salany meńgergen ámbebap kásip ıeleri qajet bolsa psıholog ta, medbıke de, ustaz da bolady. Solardyń biri – Gúlnur Ramazanova. Ol birneshe jyl boıy Soltústik Qazaqstan oblysy Podgornoe aýylynda osy salada jumys istep keledi. Kazinform tilshisi kásibı mereke qarsańynda áleýmettik qyzmetkerdi áńgimege tartty.
– Gúlnur Asqarqyzy, bul salada júrgenińizge neshe jyl boldy? Jumysyńyz ózińizge unaı ma?
– Áleýmettik qyzmetker bolyp eńbek etip jatqanyma – 14 jyl. Al negizgi mamandyǵym – medbıke. Petropavldaǵy medıtsınalyq kolledjini 1986 jyly bitirgenmin. 2005 jyly Jambyl aýdanynan osy Qyzyljar aýdanynyń Podgornoe eldimekenine kóship keldik. Naqty óz mamandyǵym boıynsha jumys bola qoıǵan joq, keıin áleýmettik qyzmetker bolýǵa usynys tústi. Bul – qazirgi tańda suranysqa ıe mamandyqtardyń biri. Ári biz qarttaryn syılaǵan, qurmettegen elmiz ǵoı. Jasy ulǵaıyp, demeýsiz qalǵan ata-ájelerdiń keregine jarap jatqanyma, solardyń bata-tilegin alyp júrgenime qýanyshtymyn.
Jumysym unaıdy. Áıtpese men ózime unamaǵan jerde uzaq ýaqyt júre almaımyn. Jumysymnyń basty ereksheligi – qamqorlyqtaǵy ata-ájelerdiń týystaı, ýaqyt óte kele týǵan ata-anańdaı bolatyny. Úlkender kishkene keshikseń alańdap otyrady, men olardyń, olar meniń jaǵdaıymdy biledi. Kópti kórgen jandarmen syrlasamyz, aqyldasamyz.
Mysaly Lıdııa Vasılevnaǵa 12 jyldan beri kómektesip kelemin, ol maǵan qyzym dep aıtady. Seksenge jaqyndaǵan ájeıdiń eki uly jáne qyzy bar, olar Reseıde turady. Jalǵyz qalǵan ájeımen jaqyn týys sııaqtymyz, bir-birimizge syrymyzdy aıtamyz, kópti kórgen kisi keıde aqyl-keńesimen bólisedi. Máselen baý-baqshada júrgende kókónisti qalaı ósirý kerek, jemisti qalaı kútý qajettigi týraly keńes beredi. Jemis-jıdekti qysqa daıyndaý boıynsha sol kisiden biraz nárseni úırendim.
– Qansha adamǵa kómektesesiz? Olar týraly aıtyńyzshy.
– Buryn meniń kómegime alty adam muqtaj edi, ekeýin kelin-balalary alyp ketti. Qazir úsheýimen jumys isteımin. Olardyń ul-qyzdary Reseıde turady. Lıdııa Vasılevna – 77 jasta, Nadejda Georgıevna – 75 jasta. Al Galına Iosıfovna – 87 jasta, ol qudaı qosqan qosaǵymen birge turady.
– Sonda sizdiń mindetińizge naqty ne kiredi?
– Men olarǵa aptasyna eki ret, eki saǵatqa baramyn. Dúkenge soǵyp azyq-túligin aparyp beremin, dári-dármegi bitip qalsa jetkizemin. Qysta otyn-sýyn kirgizemin. Aptasyna bir ret turǵan jerlerin tazalap beremin. Al jazda úılerin áktep, eden-esikterin syrlaıtyn bolsa qastarynda bolamyn, kómektesemin nemese jumysshylar taýyp beremin. Kommýnaldyq aqyny tóleımin. Biz olardyń turmysyna barynsha jaıly jaǵdaı jasaýymyz kerek.
– Ata-ájelerdiń túnde nemese demalys ýaqytynda kómek surap, úıine shaqyratyn kezderi bola ma?
– Iá, onsyz bolmaıdy. Aptasyna eki kún barýǵa mindetti bolsaq ta, bul jumysty qatyp qalǵan bir tártippen oryndaýǵa kelmeıdi. Sondyqtan da osy mamandyqty tańdarda munyń bárin eskerý kerek. Keıde senbi-jeksenbi azyq-túlikteri bitip qalǵanda kómek surap shaqyrady. Bir ájemizdiń 87-degi jubaıy túnde qaıtys bolyp, ne isterin bilmeı, maǵan habarlasty. Mundaıda «meniń jumys ýaqytym bitti» dep aıtpaımyz, baryp kómektesemiz.
– Sizder kóbine jalǵyz qalǵan, aýyratyn qart adamdarǵa kómektesesizder. Olardyń kóńilin tabý ońaı emes shyǵar? Jumys barysynda basqa nendeı kedergilerge tap bolasyzdar?
– Durys aıtasyz, úlken kisiniń kóńilin tabý ońaı emes. Birde aýyryp otyrady, birde kóńildi. Qubylmaly aýa raıy sııaqty ǵoı. Biz, áleýmettik qyzmetkerler ári dos, ári kómekshi, ári psıholog sııaqty kómek kórsetemiz. Qarııalar jalǵyz turǵannan keıin sóılesetin adamy joq, sher tarqatqysy keledi. Biz barǵanda olarmen áńgimelesemiz. Aýrýyn aıtady, balalaryn saǵynyp eske alady. Tyńdaımyz, kóńilderin kóterýge tyrysamyz.
Buryn jumystyń eń qıyn tusy úlkenderge sý tasyp berý bolatyn. Ásirese qysta, aıaz ben boranda ábigerge túsetinbiz. Qazir bári úılerine sý kirgizip aldy. Jalpy jumys barysy qıyn emes. Otyn kirgizem, esik aldyn qar bassa, sony kúrep jol ashamyn. Mundaıda, ádette joldasym kómekke keledi. Aýyr jumysty ol atqaryp jatqanda, men úıdiń sharýasyn bitiremin.
– Áleýmettik qyzmetkerge qandaı talaptar qoıylady?
– Bul jumysqa tek medıtsınalyq, pedagogıkalyq bilimi bar mamandardy jáne psıhologtardy ǵana alady. Óıtkeni bizdiń eń basty mindet – qamqorlyǵymyzdaǵy ata-ájelermen til tabysý, olardyń kóńilin aýlap, qıyn jaǵdaıda kómek kórsetý. Keıde dáriger jazyp ketken ekpeni de qoıý kerek bolady.
– Bul salaǵa kelgenińizge ókingen kezińiz bolǵan joq pa?
Joq, ókingen emespin. Qaıta olarmen jumys istegen unaıdy. Qamkóńil qarttardy qýantý – asa saýapty is qoı. Ata-ájelerimniń alǵysyn, aq batasynyń alyp júrgenime qýanamyn. Eńbekaqyma da kóńilim tolady. Merekelerde elep, eskerip jatady. 2016 jyly oblys ákiminiń Qurmet gramotasymen marapattaldym. 2019 jyly bizdiń basqarmanyń gramotasyn aldym. Keıde nemerelerime ýaqyt bólýge qol tımeı ketedi. Ul-qyzymnan bes nemere-jıenim bar. Basymnyń aman, baýyrymnyń bútin bolýy osy kisilerdiń alǵysynan shyǵar dep oılaımyn.
– Áńgimeńizge kóp raqmet!
