Kámeletke tolmaǵan balaǵa bankte depozıt ashýǵa bola ma

NUR-SULTAN. QazAqparat – «Fingramota Online» qosymshasyna jeltoqsan aıynda jıi kelip túsken suraqtardyń arasynda kámeletke tolmaǵan balaǵa bankte depozıt ashý múmkindigi suralǵan. Osy oraıda fingramota.kz saıtynda bul suraqtarǵa berilgen jaýap usynyldy, dep habarlaıdy QazAqparat.

«Qazirgi ýaqytta depozıtterdi ashý boıynsha tikeleı shekteýler joq. Qazaqstannyń kez kelgen bankinde 18 jastan bastap depozıt ashýǵa bolady. Keıbir bankter ata-analardyń nemese qamqorshylardyń bastamasymen jáne kelisimimen «balalar» depozıtin ashýdy usynady. Kámeletke tolmaǵandarǵa óz betinshe depozıt ashýdy tek birneshe bank usynady, olar depozıt ashý kezinde ózderiniń ishki erejelerine súıenedi. Bul rette, ata-analardyń nemese qamqorshylardyń kelisimi mindetti túrde bolýy tıis», - delingen mamandardyń jaýabynda.

Aıta keteıik, QR Qarjy naryǵyn retteý jáne damytý agenttigi 2020 jylǵy 25 maýsymnan bastap «Fingramota Online» mobıldi qosymshany iske qosty. Bul qarjy retteýshisiniń halyqpen jáne bıznespen ózara is-áreketiniń yńǵaıly quraly.