Kamchatkadaǵy jer silkinisinen keıin janartaýlar atqylaı bastady
ASTANA. KAZINFORM — Kamchatkada bes janartaýda bir mezgilde belsendilik baıqalýda, sol sebepti olarǵa jaqyndaýǵa bolmaıdy, dep habarlaıdy TASS agenttigi.
Reseıdiń Tótenshe jaǵdaılar mınıstrliginiń aımaqtyq basqarmasy kelesi janartaýlar týraly málimet berdi:
-
Klıýchevskoı — janartaý shyńynda atqylaý jalǵasyp, kúsheıip keledi, strombolı tıpindegi jarylystar, kúl laqtyrý jáne lava aǵyndarynyń túsýi baıqalady. Kúl bulttarynyń bıiktigi 10 km-ge deıin jetýi múmkin.
-
Shıvelých — ekstrýzıvti-eksplozıvti atqylaý jalǵasýda, kúl shyǵaryndylary 8 km-ge deıin kóterilýi yqtımal.
-
Karymskıı — shyńdyq atqylaý jalǵasýda, kúl laqtyrý 8 km-ge deıin jetýi múmkin.
-
Bezymıannyı — álsiz ekstrýzıvti-eksplozıvti belsendilik tirkelip otyr, álsiz kúl shyǵaryndylary bolýy múmkin.
-
Kambalnyı — janartaýda seısmıkalyq belsendilik tirkelýde, bul jarylysty atqylaýǵa ákelýi yqtımal. Kúl bulttarynyń bıiktigi 6 km-ge deıin jetýi múmkin.
Ǵalymdardyń pikirinshe, Shıvelých pen Klıýchevskoı janartaýlarynyń belsendiligi 30 shildede bolǵan joıqyn jer silkinisinen keıin kúsheıe túsken.
Kamchatkadaǵy zilzaladan keıingi jaǵdaı
30 shildede Kamchatka mańyndaǵy teńizde 8,8 magnıtýdalyq joıqyn jer silkinisi boldy. Bul — 1952 jyldan beri tirkelgen eń qýatty silkinis. Jer silkinisi Tynyq muhıtynda tsýnamıdi týdyrdy. Osyǵan baılanysty Japonııa, AQSh jáne Fılıppın bıligi qaýip týraly eskertý jarııalady.
Seısmologtardyń deregi boıynsha:
-
Bir táýlikte 146 aftershok tirkelgen, magnıtýdasy 3,2-den 6,2-ge deıin.
-
Adamdar turǵan jerlerde 20-dan astam dúmpý 2–5 ball aralyǵynda sezildi.
-
Qazirgi tańda 160-tan astam adam ýaqytsha ornalastyrý pýnktterinde turyp jatyr.
-
RF TJM psıhologtary turǵyndarmen jumys júrgizip jatyr.
Seısmıkalyq belsendilik birtindep tómendep kele jatqanyna qaramastan, ol áli de joǵary deńgeıde. Ǵalymdardyń boljamynsha, aftershoktar birneshe aıǵa deıin jalǵasýy múmkin.
Kamchatkadaǵy jer silkinisinen keıin Klıýchevskaıa Sopka janartaýy atqylaı bastaǵanyn habarlaǵan edik.