«Qambarata-1» GES-iniń qurylysyna Qazaqstan qansha úles qosady
ASTANA. KAZINFORM – Qyrǵyzstandaǵy «Qambarata-1» GES-in qoldanysqa berýdiń úshjaqty kelisimshart jobasy jarııalandy.
Qujat Qazaqstan, Ózbekstan jáne Qyrǵyz Respýblıkalarynyń Úkimetteri arasynda bekitiledi. Kelisim Qyrǵyzstandaǵy Naryn ózeninen boı kóteretin «Qambarata-1» GES-in úsh el birlesip salyp, keıin ony ózara tıimdi paıdalanýǵa baǵyttalǵan.
Jobany iske asyrýǵa ketetin qarajatty úsh memleket birlesip shyǵarady. Sol úshin jeke aktsıonerlik qoǵam qurylady.
Kelisimshart jobasynyń 4-babynda osy aktsıonerlik qoǵamnyń jarǵylyq kapıtalyna Qyrǵyz tarapy – 34 (otyz tórt) paıyz, Qazaqstan tarapy – 33 (otyz úsh) paıyz, Ózbekstan tarapy – 33 (otyz úsh) paıyz ıelik etetini, sáıkesinshe shyǵyndy da osy kólemde óteıtini aıtylǵan. Biraq stansa salynyp bitkennen keıin qoǵamnyń aktsııalary men aktıvteri tutastaı Qyrǵyz Respýblıkasynyń menshigine ótedi.
«Árbir tarap qoǵamnyń quryltaıshysyn derbes aıqyndaıdy jáne óz tarapynan jáne dıplomatııalyq arnalar arqyly basqa taraptardy habardar etedi. Taraptardyń úlestik qatysýy óz úlesterin biriktirý, berý jáne satý múmkindigin tolyq qospaǵanda ózgerissiz qalady. Jobany iske asyrý respýblıkalyq bıýdjetten qosymsha qarjy bólýdi talap etpeıdi. Qarjy aktsıonerlik qoǵam quryltaıshylarynyń menshikti qarajatynan, halyqaralyq qarjy ınstıtýttary men kommertsııalyq bankterden tartylatyn qaryzdardan, granttardan alynady», - delingen qujattyń túsindirme jazbasynda.
Sondaı-aq, túsindirme jazbada «Qambarata-1» GES-in birlesip salý Qazaqstanǵa ne beretini aıtylǵan.
«Qazaqstannyń jobaǵa qatysýy túbegeıli mindet bolyp tabylady. Ony sheshý «Toqtoǵul» GES-iniń jumys rejımin energetıkalyq rejımnen ırrıgatsııalyq rejımge birtindep aýystyrý úshin qajet. Bul vegetatsııalyq kezeńde ońtústiktegi oblystardy sýmen jabdyqtaýdyń turaqtylyǵyn arttyrady. «Qambarata-1» stansasy Qazaqstan úshin Syrdarııa ózeniniń aǵynyn kópjyldyq merzimde retteıtin sý qoımasy retinde strategııalyq mańyzdy mánge ıe», - delingen qujatta.
