Kamala Harrıs pen Donald Tramptyń teledebaty qalaı ótti

ASTANA. KAZINFORM — AQSh prezıdenttigine kandıdattar Kamala Harrıs pen Donald Tramp qarasha aıyndaǵy saılaý aldynda ABC News arnasynyń tikeleı efırinde saılaý aldyndaǵy alǵashqy jáne yqtımal jalǵyz teledebatyn ótkizdi. Pikirsaıys saılaýǵa eki aıdan az ýaqyt qalǵanda ótti, dep habarlaıdy VVS. 

Pikirtalastyń birinshi bóligi jáne ABC júrgizýshisi Devıd Mıýır qoıǵan birinshi suraq ekonomıkaǵa arnaldy.

«Siz amerıkalyqtardyń tórt jyl burynǵyǵa qaraǵanda jaqsyraq ómir súrip jatqanyna senesiz be?» — dep surady ol.

Harrıs birinshi bolyp jaýap berdi jáne «múmkindikter ekonomıkasyn» qurýdy josparlap otyrǵanyn aıtty. Ol baspana máselesin sheshýge, jas otbasylar men shaǵyn bızneske kómektesýge ýáde berdi.

Tramp demokrattar tórt jylda ekonomıkany joıǵanyn aıtty, al Harrıs Djo Baıdenniń ekonomıkalyq baǵdarlamasyn kóshirip alǵan.

«Donald Tramp bizdi Uly kúızelis ýaqytynan bergi eń sumdyq jumyssyzdyqqa ushyratty. Biz (demokrattar) jasaǵannyń bári — Donald Tramp ornatqan tártipsizdikti ornyna keltirý», — dedi Harrıs.

Vıtse-prezıdent Donald Tramptyń jańa merzimi qandaı bolýy múmkin ekenin kórsetetin «Joba 2025» baǵdarlamasyna bólek toqtaldy. Demokrattar óz bastamasyn osy qujatqa qarsy qoıyp otyr.

Myńǵa jýyq betti qamtıtyn jobanyń avtory — Heritage Foundation. Ony daıyndaýǵa odaqtastary atsalysqanymen, eks-prezıdenttiń ózi odan aýlaq bolýǵa tyrysty.

Pikirtalas kezinde eks-prezıdent «2025 jobasyn» oqymaǵanyn jáne oqýǵa nıeti de joq ekenin aıtyp, taǵy da bas tartty.

Úmitkerler bir-birin birneshe ret ótirik aıtty dep aıyptady.

Pikirtalastyń basynda Harrıs kórermenniń Tramptan «kóp ótirik, shaǵym men jaman sóz» estıtinin aıtty.