«Qaltaly «aqyndar» kóbeıip ketti» - baspasózge sholý
***
«Egemen Qazaqstan» gazetiniń jazýynsha, keshe Qasym-Jomart Toqaevtyń tóraǵalyq etýimen Parlament Senatynyń otyrysy boldy. Onda senatorlar 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Armenııa Respýblıkasynyń qosylýy týraly shartty ratıfıkatsııalady. Qujat týraly baıandaǵan Ulttyq ekonomıka mınıstri E.Dosaev tórt erkindikti: taýarlar, kapıtal, qyzmet kórsetýler jáne jumys kúshiniń erkin qozǵalysyn qamtamasyz etýge jaǵdaı jasaýǵa baǵyttalǵan kelisimderge Armenııanyń qosylýy Sharttyń negizi bolyp tabylatynyn atap ótti. Shart kúshine engen kúnnen bastap Armenııa Respýblıkasy Eýrazııalyq ekonomıkalyq odaqtyń múshesi bolady jáne Shartta kózdelgen mindetterdi ózine qabyldaıdy. «Senatorlar Syrtqy ister mınıstri E.Ydyrysov usynǵan Eýrazııalyq ekonomıkalyq qoǵamdastyqtyń qyzmetin toqtatý týraly shartty da ratıfıkatsııalady. Qujattyń maqsaty Eýrazııalyq ekonomıkalyq qoǵamdastyqtyń, sondaı-aq, onyń organdarynyń qyzmetin 2015 jylǵy 1 qańtardan bastap toqtatý bolyp tabylady», - dep jazady basylym. Maqala «Odaq taǵy bir elmen tolyǵyp otyr» degen taqyryppen berilgen.
«Keshe Astanadaǵy Ortalyq kommýnıkatsııalar qyzmetinde Almaty qalasynyń ákimi Ahmetjan Esimovtiń qatysýymen brıfıng ótti. Ol ońtústik megapolıstiń áleýmettik-ekonomıkalyq damýy men memlekettik jáne salalyq baǵdarlamalardyń júzege asyrylýy týraly baıandap, tilshilerdiń suraqtaryna jaýap berdi», - dep jazady el gazeti «Egemen Qazaqstan» . Basylymnyń jazýynsha, Almaty qalasy ekonomıkasynyń negizin shaǵyn jáne orta bıznes quraıdy. Máselen, elimizde shyǵarylatyn ónim men kórsetiletin qyzmettiń úshten bir bóligin shaǵyn jáne orta bıznes atqarady. Qala bıýdjetine túsken barlyq salyqtyq túsimderdiń 60 paıyzyn shaǵyn jáne orta bıznes beredi. Almaty saýda kólemi boıynsha respýblıkada birinshi orynda tur. Qalada bólshek saýda aınalymy 2008-2013 jyldar aralyǵynda 1,4 esege ósip, 1 407,5 mlrd. teńgeni quraǵan. Osy rette Almatynyń respýblıkalyq taýar aınalymyndaǵy jalpy úlesi 30 paıyzdan 40 paıyzǵa ósken. Sonymen qatar Ahmetjan Smaǵululy brıfıng barysynda Almaty 2022 jylǵy Qysqy Olımpıada oıyndaryn ótkizý úshin laıyqty deńgeıde jumystar júrgizýde ekenin atap kórsetken. «Biz Qysqy Olımpıadany ótkizýge ótinim berdik. Ózderińiz de biletindeı, qazirgi ýaqytta 2 qala - Almaty men Beıjiń Qysqy Olımpıadany ótkizýge úmitker bolyp otyr. Al munyń barlyǵy da álemdik qoǵamdastyqtyń qyzyǵýshylyǵyn týǵyzatyny sózsiz», - dedi A.Esimov.
***
«Elimizdiń birqatar óńirlerinde elektr energııasy tapshylyǵy kún ótken saıyn kúsheıip keledi. Shalǵaı aýyldardaǵy jaryqtyń jalp ete salýy úırenshikti jaǵdaıǵa aınala bastady. Al keıbir aýyldarǵa barsańyz, syǵyraıǵan jaryqtan mezi bolasyz», - dep jazady «Aıqyn» gazeti senbilik sanyndaǵy «Torǵaı stansasy táýeldilikten qutqara ma?» degen taqyryptaǵy maqalasynda. Basylymnyń jazýynsha, sebebi, elektr energııasy tapshy. Mysaly, búginderi bir ǵana Qostanaı óńirinde 600-700 megavatt elektr qýaty jetispeıdi eken. Aqtóbe óńirinde de qýat kózine degen suranys osy shamada. Osy eki oblysty elektr qýatyna táýeldilikten qutqarý úshin Torǵaı jylý-elektr stansasy salynbaq. Keshe atalǵan jobany júzege asyrýdyń alǵysharty retinde «Taý-Ken Samuryq» AQ men túriktiń Eren Enerji kompanııasy arasynda Torǵaı JES salý jónindegi memorandýmǵa qol qoıyldy. «Memorandým Qostanaı oblysyndaǵy Qusmuryn kómir ken ornyn ıgerý negizinde jylý elektr stansasyn salý jobasyn júzege asyrýdy kózdeıdi. Dál qazirgi tańda Eren Enerji kompanııasy jobanyń aldyn ala tehnıkalyq ekonomıkalyq negizdemesin ázirlep jatyr. Bul - kompanııa quıatyn 3 mlrd dollardan astam qarjy, árıne, salmaqty ınvestıtsııa. Jobany júzege asyrý barysynda jańadan jumys oryndary qurylady. Biz JES qurylysyna jergilikti kompanııalardy tartamyz, osylaısha el qazynasyna salyq ta tólenedi», - deıdi «Taý-Ken Samuryq» AQ basshysy Májıt Turmaǵambetov.
Osy basylymnyń búgingi sanynda aqyn, Halyqaralyq «Alash» ádebı syılyǵynyń laýreaty Ibragım Isaevpen aradaǵy suhbat «Qaltaly «aqyndar» kóbeıip ketti» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Qazaq ádebıeti sonaý aýyzeki ádebıetinen beri osy zamanǵa deıin toqyraýǵa ushyraǵan kezderi bolǵan emes. Ol sol qalpyn saqtap, tipti órkendeý ústinde kele jatyr. Qazaq ádebıeti kez kelgen eldiń ádebıetimen terezesi teń tur. Burynǵy odaqtas respýblıkalar poezııasy ishinde qazaq poezııasynyń joǵary ekeni sezilip turady. Ádebıettegi eń joǵary mártebe - Nobel syılyǵyna ıe bolý. Al sony alyp jatqan ádebıetshilerdiń birazynyń shyǵarmalaryn oqyp shyqtym. Qazaqta solardyń deńgeıinen tómen emes qalamgerler bar. Biraq bizde ádebıetti nasıhattaý ma, qoldaý ma, áıteýir birdeńe jetispeı jatqan sııaqty bolyp kórinedi. Al qazaq poezııasyna kelsek, ár eldiń mentalıtetine, minez-qulqyna qaraı olardyń poezııasy ártúrli bolyp keledi», - deıdi. Sonymen qatar ol jazýshylar úshin jalǵyz tabys kózi ol - qalamaqy ekendigin, alǵash egemendik alǵan jyldarda kitapqa qalamaqy tóleý toqtatylǵanyn, al bul qalamgerlerge jasalyp otyrǵan qııanat sııaqty bolyp kórinetindigin ashyq aıtqan.
