Qallekı teatrynyń jańa maýsymy: kórermender Shámshimen qaýyshady
Qallekı teatrynyń óner súıer qaýymdy "Abaı" tragedııasymen qarsy alýy dástúrge aınalǵan. Abaı - teatrǵa esimi berilgen Qalıbek Qýanyshbaev shyǵarmashylyǵyndaǵy shoqtyǵy bıik ról edi. "Abaı" tragedııasynyń sahna shymyldyǵyn túrip, kórermenge birinshi bolyp jol tartýynyń syry osynda jatyr.
Spektakldiń qoıýshy rejısseri - QR Eńbek sińirgen qaıratkeri Álimbek Orazbekov. Ondaǵy jas Abaı beınesi QR eńbek sińirgen qaıratkeri Nurken Óteýilovke berilse, kemeńger Abaıdy - Qazaqstannyń Halyq ártisi Tilektes Meıramov somdaıdy.
Ótken maýsymda kórermenge "Er Tóstik", "Ámire", "Qyzyl oramaldy shynarym", "Zere" qoıylymdary usynylǵan bolatyn. Teatr ujymy bul joly da halyqty tyń týyndylarmen qýantpaq.
"Bıyl elimiz boıynsha aýqymdy shara - EKSPO-2017 kórmesin atap óttik, ondaǵy kórme merekelerin joǵary deńgeıde ótkizýge atsalystyq. Osyǵan baılanysty, jazǵy ýaqytta demalysqa shyǵatyn teatr qyrkúıekke deıin jumys istedi jáne bir aı demalyp, jańa maýsymǵa ázirlendi. Jańa maýsymdy ashatyn "Abaı" qoıylymynan bólek, ózge de qyzyqty, tarıhı spektaklderdi usynýdy kózdep otyrmyz. Atap aıtqanda, kórermender Shámshi Qaldaıaqovpen qaýyshatyn bolady, Oralhan Bókeı shyǵarmalaryn tamashalaı alady. Sheteldik klassıkalyq shyǵarmalardy da nazardan tys qaldyrmaımyz", - dedi Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń jetekshisi Aıbolat Seksembaev Astanada ótken baspasóz máslıhatynda.
Sonymen birge, teatr jetekshisi Q.Qýanyshbaev teatry qarasha aıynda Jezqazǵanda ótetin Janat Hadjıev atyndaǵy aımaqtyq festıvalge "Kún sáýlesi túspegen" psıhologııalyq dramasymen qatysatyndaryn habarlady. Odan bólek, túrli respýblıkalyq jáne álemdik festıvalderge qatysý josparlanǵan.
