Qalyń qar: Almatyda uzyn-sonar kólik keptelisi paıda boldy
ALMATY. KAZINFORM – Almatyda tańerteńnen jaýa bastaǵan jaýynnyń arty qalyń qarǵa aınaldy. Saǵat 12:00-degi jaǵdaı boıynsha qalaǵa 7 sm qar jaýdy.
Qalyń qardyń túsýine baılanysty qalada kólik keptelisteri 9,10 baldyq kórsetkishterge jetti. Ol týraly málimet 2GIS servısine shyqty.
Sondaı-aq Almaty joldarynda qar tazalaý jumystary uıymdastyryldy. Almaty ákimdiginiń málimetinshe, qar tazalaýǵa 483 arnaıy tehnıka men 1180 jol jumysshysy jumyldyryldy. 176 qum taratqyshtyń kúshimen kóktaıǵaqqa qarsy materıaldar (KQM) sebiledi. Saǵat 12:00-degi jaǵdaı boıynsha 1120 tonna KQM paıdalanyldy.
«Saǵat 12:00-den bastap jol polıtsııasy kólikteriniń bastaýymen 11 kolonnanyń kúshimen qardy tazartý jumysy uıymdastyryldy. Trotýarlardy qardan tazartýǵa 174 shaǵyn gabarıtti tehnıka jumyldyryldy. Olar trotýarlardy, jalpy paıdalaný oryndaryn jáne áleýmettik mańyzy bar obektilerge kireberisterdi qardan tazartyp jatyr», - dep habarlady ákimdiktiń baspasóz qyzmeti.
Qoǵamdyq kólik aıaldamalary men jer ústi jaıaý júrginshiler ótkelderi qolmen tazartylyp jatyr. Aýdan ákimdikterinde jumys óndirisin baqylaý boıynsha táýlik boıy kezekshilik uıymdastyryldy.
Eske salsaq, Almaty halyqaralyq əýejaıynda aýa raıynyń qolaısyzdyǵyna baılanysty 12 əýe reısi keshiktirildi.
Almatylyq polıtseıler aýa raıynyń nasharlaýyna baılanysty júrgizýshilerdi jolda saq bolýǵa jáne jol erejelerin qatań saqtaýǵa shaqyrdy.
Sondaı-aq Almatyda 16 aqpan tańerteńnen 17 aqpan túnge deıin jaýyn jaýyp, arty qalyń qarǵa ulasatyny, aýa temperatýrasy mınýs 20 gradýsqa deıin tómendeıtinin habarlaǵanbyz.
