Kalıfornııadaǵy aeroǵarysh zaýytynan ýly bý shyqty: 40 myń adam evakýatsııalandy
ASTANA. KAZINFORM — Ońtústik Kalıfornııanyń shamamen 40 myń turǵynyna aeroǵarysh tehnıkasy óndirisi nysanyndaǵy rezervýardan ushpa ónerkásiptik hımııalyq zattyń kemýine baılanysty evakýatsııalaý týraly buıryq berildi, dep habarlaıdy Sınhýa
Jergilikti bıliktiń habarlaýynsha, oqıǵa iri jarylys nemese ýly zattardyń kemýne qatysty alańdaýshylyq týdyrdy.
Bılik málimetinshe, ýly zattardyń kemýi beısenbi kúni tústen keıin Orındj okrýgine qarasty Garden-Groýv qalasyndaǵy kásiporynda oryn aldy. Akrıl plastmass óndirýde qoldanylatyn tez tutanatyn hımııalyq zat — metılmetakrılat saqtaýǵa arnalǵan rezervýardan qaýipti bý shyǵa bastady.
Resmı ókilderdiń habarlaýynsha, GKN Aerospace kompanııasy paıdalanatyn nysanda saqtaý úshin úsh rezervýar bar, olardyń bireýinde salqyndatý júıesi isten shyqqan. Apattyq brıgadalar bastapqyda jaǵdaıdy túnde turaqtandyra alatynyn shamalaǵan. Alaıda juma kúni jaǵdaı nasharlap, bılik evakýatsııa aımaǵyn keńeıtýge sheshim qabyldady. Birneshe qalada mektepter jabylyp, tótenshe jaǵdaılar kezinde shuǵyl áreket etý sharalary qabyldandy.
Tótenshe jaǵdaılar qyzmeti jarylys qaýpi nemese zaqymdalǵan qoımadan kemý qaýpi týraly eskertkennen keıin Garden-Groýv pen onyń aınalasyndaǵy eldi mekenderdiń turǵyndaryna evakýatsııalaý týraly buıryq berildi.
Osyǵan deıin Nıý-Iork pen Nıý-Djersıde sý tasqyny men daýyldan keıin myńdaǵan adam jaryqsyz qalǵanyn jazdyq.
