«Qaladan aýylǵa»: BQO-da myńǵa jýyq adam aýylǵa qonys aýdardy

ASTANA. KAZINFORM – Batys Qazaqstan oblysynda byltyr iske qosylǵan «Qaladan aýylǵa» jobasy turǵyndar tarapynan qoldaý tapty jáne myńǵa jýyq adam aýylǵa kóshti. Joba týraly oblys ákimi Narıman Tóreǵalıev aıtyp berdi.

– Joba aıasynda qala aımaqtarynan myńǵa jýyq turǵyny bar 195 otbasy aýylǵa kóshti. Onyń 600-i bala. Qonys aýdarǵan otbasylardyń barlyǵy da baspanamen qamtyldy. Aýyldaǵy halyq sanyn turaqtandyrý jáne ekonomıkalyq belsendilikti arttyrýǵa baǵyttalǵan baǵdarlamanyń naqty nátıjesi kórine bastady, – dedi N.Tóreǵalıev elordada Ortalyq kommýnıkatsııalar qyzmetinde.

Qonys aýdarǵan azamattardyń 216-sy turaqty jumysqa ornalasyp, aýyldyń áleýmettik-ekonomıkalyq damýyna úles qosyp keledi. Olardyń arasynda dárigerler, muǵalimder, ózge de qajetti salalardyń mamandary, sonymen qatar «Aýyl amanaty» baǵdarlamasy arqyly óz kásibin ashqan azamattar da bar.

– Bul sharalardyń arqasynda aýyldardaǵy kadr tapshylyǵy máselesi sheshimin taýyp, jabylýdyń aldynda turǵan birneshe mektep óz jumysyn jalǵastyrý múmkindigine ıe boldy. Bul «Qaladan aýylǵa» jobasynyń aýyl áleýetin arttyrýdaǵy mańyzdy qadamǵa aınalǵanynyń aıqyn dáleli, – dedi oblys ákimi.

Aıta keteıik, bıyl Batys Qazaqstan oblysynyń bıýdjeti 33,5% ulǵaıyp, 634 mlrd teńgege jetti.

Jyl basynan beri oblystaǵy agrarlyq salaǵa 50,6 mlrd teńgege qoldaý kórsetilgen.