Qaladaǵy fontandarda nege shomylýǵa bolmaıdy
ASTANA. KAZINFORM – Ystyq kúnderi balalardyń qalalyq fontandarda sý shashyp oınap júrgenin jıi kórýge bolady. Alaıda olar bul árekettiń densaýlyqqa eleýli zııan tıgizýi múmkin ekenin túsine bermeıdi. Fontandarda shomylýǵa qatań tyıym salynǵan, dep jazdy Astana qalasy ákimdiginiń resmı saıty.
Astanalyq qutqarýshylar fontandarda shomylýdyń qanshalyqty qaýipti ekenin eske saldy. Mehanıkalyq jaraqat alý qaýpi joǵary: tegis emes better, sý aǵyndary, dekoratıvti elementter, sondaı-aq olardyń ishine ornatylǵan qubyrlar men sorǵylar qulaý men jaraqatqa ákelýi múmkin. Sonymen qatar kóptegen fontan jaryqtandyrý jáne basqa da elektr jabdyqtarymen jabdyqtalǵan, al bul toq soǵý qaýpin týyndatady.
Sol sebepti barlyq fontanda shomylýǵa tyıym salynǵanyn bildiretin arnaıy belgiler ornatylǵan. Fontandar – qalany kóriktendirý elementteri. Olar aýany ylǵaldandyrýǵa jáne estetıkalyq maqsattarǵa arnalǵan.
Bul qurylǵylarda sýdy súzgiden ótkizý jáne tazalaý júıeleri qarastyrylmaǵan.
– Fontandar qoǵamdyq oryndarda ornalasqandyqtan, olardyń sýy tez lastanady: ishine qoqys, japyraq, shań-tozań, jándikter túsedi. Onda qańǵybas janýarlar men qustar da shomylýy múmkin, al olar túrli ınfektsııalardyń tasymaldaýshysy. Sý – vırýstar men bakterııalar úshin qolaıly orta. Al aýa temperatýrasynyń joǵary bolýy mıkroaǵzalardyń tez kóbeıýine yqpal etedi. Sondyqtan fontanda shomylýǵa ǵana emes, tipti qoldy nemese jemis-jıdekti jýýǵa da bolmaıdy. Mundaı áreketterdi tek aýyz sýǵa arnalǵan arnaıy oryndarda ǵana jasaý kerek, – dep eskertti Astana qalasy Sanıtarııalyq-epıdemıologııalyq baqylaý departamenti basshysynyń orynbasary Muhamǵalı Aryspaev.
Zerthanalyq taldaýlar kórsetkendeı, mundaı sýlarda entero jáne rotavırýstar, ishek taıaqshalary, salmonellalar men shıgellalar (dızenterııa qozdyrǵyshtary) sııaqty jedel ishek ınfektsııalaryn qozdyratyn patogendi mıkroaǵzalar bolýy múmkin. Ásirese baýyrdy zaqymdaıtyn jáne onyń qyzmetine aýyr nuqsan keltiretin A gepatıti vırýsynan saq bolý kerek.
Esildegi fontanǵa ₸1 mlrd ysyrap qylǵan mádenıet basqarmasy eks-bastyǵy ustalǵanyn jazǵan edik.