Qalada jaryq joq: Aqtaýda elektr energııasy tapshylyǵy bar ma
AQTAÝ. KAZINFORM — Mańǵystaý oblysynyń ortalyǵy Aqtaý qalasynda sońǵy 2-3 kúnde elektr energııasy máselesi týyndady. Turǵyndar jaryqtyń jıi óshetinine shaǵymdanyp otyra. Osyǵan baılanysty quzyrly organ ókilderi brıfıng ótkizip, jaǵdaıdy baıandady.
«Aqtaý elektr jelileri basqarmasy» memlekettik kommýnaldyq kásipornynyń bas ınjeneri Etırbek Mahambetovtyń aıtýynsha, 13 shilde kúni — 11, 14 shildede — 15 apattyq jaǵdaı tirkelgen.
Mamandar kúni-túni jumys istep, elektr energııasyn qaıta qosty. Alaıda, keshe taǵy 3 jerde apat bolǵan.
— Keshe 3 apat boldy, 17, 16, 18 men 19-shaǵynaýdandarda eki brıgada jumys istep jatyr. Olarǵa jedel qyzmet brıgadasyn da qostyq. Maman da, tehnıka da jetkilikti. Eń uzaq jóndeý jumysy keshe boldy. 29-shaǵyn aýdanda kabel zaqymdalǵan. Sony jóndeýge 15 saǵat jumsaldy. Qalǵandaryn tez-tez qosyp jatyrmyz, — deıdi Etırbek Mahambetov.
Kásiporyn bas ınjeneriniń sózinshe, apattardyń basty sebebi — kabelderdiń eskirýi. Aptap ystyqta elektr energııasyna suranys artyp, tozyǵy jetken jeliler isten shyǵyp jatyr.
— Kabelder baıaǵydan jatyr ǵoı, aýystyrý kerek jáne qalyńdatý kerek. Jańartylsa sóný toqtaıdy. Aýa raıy ysyp ketken soń eldiń bári kondıtsıonerin qosqan, sol sebepten jelilerge júkteme kóbeıdi. Qazirgi tańda elektr energııa sonyń saldarynan sónip jatyr, — deıdi «Aqtaý elektr jelileri basqarmasy» memlekettik kommýnaldyq kásipornynyń bas ınjeneri Etırbek Mahambetov.
Aqtaý qalasy boıynsha jalpy uzyndyǵy 485 shaqyrymdy quraıtyn elektr jelisi bar. Onyń 66 paıyzy, ıaǵnı shamamen 320 shaqyrymy tozǵan.
Aqtaý qalalyq turǵyn-úı kommýnaldyq sharýashylyǵy bóliminiń basshysy Beksultan Shalabaevtyń aıtýynsha, aldaǵy jylytý maýsymyna deıin, apat kóp bolyp jatqan jerlerdegi kabeldiń 74 shaqyrymy jańartylady.
— Bıyl avarııalyq jaǵdaılardy boldyrmaý, turǵyndardy sapaly elektr qýatymen qamtamasyz etý jáne jelilerdiń tozýyn azaıtý maqsatynda uzyndyǵy 74 shaqyrym eski jáne tozǵan kabeldik jelilerdi jańartý kózdelip otyr. Qazir jobalyq smetalyq qujattamasy jasalyp jatyr. Osy aptada daıyn bolady, — deıdi bólim basshysy.
Mańǵystaý oblystyq energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Nurlan Orynbasarov ta jaryq máselesine pikir bildirdi.
Onyń aıtýynsha, qazirgi tańda elektr energııasynyń jıi óshýine óndirýshi kásiporyn — Mańǵystaý atom energetıkalyq kombınatynyń esh qatysy joq.
— Qazirgi óshýlerge MAEK-tiń qatysy joq. MAEK shekteý qoıyp otyrǵan joq. ıAǵnı elektr energııasynyń tapshylyǵy joq. Negizgi másele — qaladaǵy kabeldik jelilerdiń tozýy. 50 jyldan asty ǵoı qala salynǵaly. Sodan beri qaıta jańǵyrtý jumystary júrgizilmegen, — deıdi Nurlan Orynbasarov.
Nurlan Orynbasarovtyń sózinshe, aqtaýlyqtar qysta 60 megavatt shamasynda elektr energııasyn tutynady. Al jaz mezgilinde tutyný kólemi 120-150 MGv-qa deıin ósedi.
— Buǵan deıin respýblıkalyq jáne jergilik bıýdjet esebinen tek 60 transformator aýystyryldy. Endi qala ákimdigi aldaǵy ýaqytta 320 shaqyrym kabeldik jelilerdi kezeń-kezeńimen jóndeýdi josparlap otyr. Bıyl alǵashqy kezeńi iske aspaq, — deıdi Nurlan Orynbasarov.
Oblystyq energetıka jáne turǵyn úı-kommýnaldyq sharýashylyǵy basqarmasy basshysynyń orynbasary Nurlan Orynbasarov óńirde elektr energııasynyń balamaly kózderin damytýǵa baǵyttalǵan jobalardy atap ótti.
— 2024 jyly qytaılyq Huadian kompanııasymen Aqtaý qalasynda qýaty 160 MVt bolatyn bý-gaz qondyrǵysyn salý jóninde kelisimshartqa qol qoıyldy. Sonymen qatar, ótken jyly Jańaózen qalasynda qýaty 247 MVt bolatyn gıbrıdti elektr stantsııasynyń qurylysy bastaldy. Jobany iske asyrý merzimi — 2024-2026 jyldar. Sonymen qatar, 2024 jyly Qaraqııa aýdanynyń Jetibaı aýylynda qýaty 50 MVt bolatyn jel elektr stantsııasynyń qurylysy bastaldy. Bul nysan 2025 jylǵy mamyrda paıdalanýǵa berildi. Al, bıyl Mańǵystaý aýdanynyń Shetpe aýylynda qýaty 20 MVt bolatyn jel elektr stansasynyń qurylysy bastaldy. Jobany iske asyrý merzimi 2025-2027 jyldar aralyǵyn qamtıdy, — deıdi Nurlan Orynbasarov.
Buǵan deıin Aqtaýdyń teń jartysy jaryqsyz otyrǵanyn jazǵan bolatynbyz.