«KADEX-2016» kórmesine 200-den astam sheteldik kompanııa qatysady

ASTANA. QazAqparat - Tórtinshi halyqaralyq «KADEX-2016» qarý-jaraq pen áskerı-tehnıkalyq múlik kórmesi - bul birinshi kezekte ozyq qarý-jaraq pen tehnıkanyń jetkizilýi men shyǵarylýyna mıllıondaǵan kelisimsharttar jasalatyn iskerlik alańy. Qazaqstannyń Qarýly kúshteri shet elderiniń jetekshi qorǵanys kásiporyndarymen birqatar qujattardyń qol qoıylýyna úmittenip otyr, dep habarlaıdy Qorǵanys mınıstrliginiń baspasóz qyzmeti.

Bıylǵy jyly «KADEX-2016» kórmesinde 35 elden 200-den asa sheteldik kompanııa qatysatynyn aıta ketken jón.

TMD elderi «KADEX-2016» halyqaralyq kórmesine belsendi túrde ózderiniń qyzyǵýshylyqtaryn bildirdi. Belarýs Respýblıkasynyń «Peleng» AAQ kompanııasy brondy tehnıkaǵa arnalǵan optıkalyq-elektrondyq prıborlar men kózdeýish keshenderin, sondaı-aq birqatar aeroǵaryshtyq fotoapparatýralardy, krımınalıstıkalyq jáne meteorologııalyq jabdyqty usynady.

Reseı áskerı tehnıkanyń aýqymdy nusqalaryn usynady. Kórmege qatysýshylardyń biri - «Oral vagon zaýyt» Ǵylymı-óndiristik korporatsııasy» AQ. Kórme sheńberinde zaýyt qashyqtyqtan basqarylatyn ámbebap jaýyngerlik modýlmen jabdyqtalǵan «Armada» shynjyrtabandy tuǵyrda jaıaý áskerdiń urys mashınasyn kórsetedi. Zaýyt brondy mashınalarynyń ereksheligi jaýyngerlik jaǵdaıda ekıpajdy qorǵap turatyn korpýstardyń mınaǵa qarsy konstrýktsııasy. Sonymen qatar reseılik «MıG» ushaq qurastyrý korporatsııasy MıG-29K, MıG-29KÝB, MıG-29M/M2 kóp fýnktsıonaldyq joıǵyshtardy usynady. Zaýyt jaýyngerlik tikushaqtardy jobalaýdy, óndirý men tehnıkalyq qoldaýdy qamtamasyz etedi.

Ýkraınalyq kompanııalar da birneshe stendterde áskerı ónimderin kórsetedi. «ANTONOV» MK - kóliktik, óńirlik jolaýshylar ushaǵy men arnaıy maqsattaǵy ushaqtardy qurý boıynsha jetekshi kásiporyndardyń biri.

«KADEX-2016» kórmesinde «ANTONOV» ártúrli maqsattaǵy An-148 jáne An-158 óńirlik ushaqtardy, An-178 jáne An-132 jańa kóliktik ushaqtardy usynady.

«KADEX-2016» kórmesi elimizdiń qorǵanys-ónerkásibi keshenin damytýǵa, Qazaqstan Qarýly kúshteriniń qorǵanys áleýetin qamtamasyz etý men óristetýge baǵyttalǵan áskerı maqsattaǵy otandyq jáne sheteldik taýar óndirýshilerge nátıjeli birlesken jumys ákeledi dep josparlanýda.