Q. Sátbaev atyndaǵy kanalǵa 8 jańa transformator ornatylyp jatyr
ASTANA. KAZINFORM — Sý resýrstary jáne ırrıgatsııa mınıstrligi Q. Sátbaev atyndaǵy kanalǵa segiz jańa transformatordy qurastyrý jáne iske qosý jumystaryn júrgizip jatyr. Jobany jyl sońyna deıin aıaqtaý josparlanǵan.
Nysandy keshendi jańǵyrtý jónindegi Jol kartasyna sáıkes, 2026 jyldyń sońyna deıin Q. Sátbaev atyndaǵy kanalǵa barlyǵy 17 jańa transformator ornatylady. Sondaı-aq 19 nasos agregaty aýystyrylady. Q. Sátbaev atyndaǵy kanal Qaraǵandy jáne Pavlodar oblystaryn, sondaı-aq Astana qalasyn aýyz sýmen qamtamasyz etedi. Sonymen qatar bul kanaldyń sýyn óńirlerdegi óndiris oryndary men sharýa qojalyqtary paıdalanady. Nysannyń jalpy uzyndyǵy — 458 shaqyrym.
- Memleket basshysynyń tapsyrmasyna sáıkes mınıstrlik Q. Sátbaev atyndaǵy kanalǵa jańǵyrtý jáne rekonstrýktsııalaý jumystaryn júrgizip jatyr. Bul sharalar kanaldyń sýyna suranys artqandyqtan qolǵa alynǵan. Joba júzege asyrylǵan soń eldi mekender men óndiris oryndaryn sýmen qamtý sapasy artyp, kanaldyń uzaq merzimdi ári qaýipsiz paıdalanylýy qamtamasyz etiledi, — dedi Sý resýrstary jáne ırrıgatsııa mınıstri Nurjan Nurjigitov.
Eske sala keteıik, buǵan deıin Túrkistan oblysynda Kóksaraı kontrrettegishin mehanıkalyq tazartý jumystary bastalǵanyn jazǵan edik.