Jibek Joly telearnasy JI kómegimen ym tilinde balalar kontentin taratady

ASTANA. KAZINFORM — Endi sóıleý, estý qabileti nashar balalar jasandy ıntellektiniń kómegimen sýrdoaýdarma jasalǵan mýltfılmderdi tamashalaı alady.

Jańa joba týraly tolyǵyraq Jibek Joly telearnasynyń dırektory Erkejan Kúntýǵan aıtyp berdi. 

— Jasandy ıntellektini áleýmettik telejobaǵa qoldanǵaly jatyrmyz. Bizdiń paıymdaýymyzǵa, elimizdegi telearnalarda estý qabileti nashar jandarǵa arnalǵan kontent joq eken, ıaǵnı ónim olar túsinetindeı sýrdoaýdarmamen berilmeıdi. Tek qana zań aıasynda jańalyqtardyń sýrdoaýdarmasy jasalady, biraq ony barlyǵy tutynady dep aıta almaımyz. Bizdegi aqparat boıynsha búginde elimizde 5 myńǵa jýyq estý qabileti nashar bala bar, olarǵa sýrdoaýdarma kerek. Osy oraıda biz otbasylyq telearna bolǵannan keıin, balalardan bastaıyq dep oıladyq. Bizdiń telearnada tańerteń 4 saǵat boıy mýltfılmder kórsetiledi jáne turaqty kórermenderimiz bar, — dedi Erkejan Kúntýǵan elordada ótken ІІ Ortalyq Azııa medıaforýmynda.

Telearna basshysynyń aıtýynsha, qazir elimizde ınklıýzıvti kontentterge asa kóńil bólinip jatyr. 

— Inklıýzıvti baǵdarlamaǵa úlesimizdi qosaıyq dep bastadyq. Bul jerde sýrdoaýdarma jasaýǵa jasandy ıntellektini qoldanamyz, óıtkeni, búginde elimizde ym tili mamandary az, tapshy. Astananyń ózinde 5-6 ǵana maman bar, olar barlyq telearnada jumys isteıdi. Sondyqtan biz jasandy ıntellektige júgindik, oǵan kómektesken jasandy ıntellektiniń kómegimen ym tilin zerttep júrgen, qazaqstandyq maman Nurzada Amangeldi. Maman 3D arqyly obraz jasady, mýltfılm testileýden ótti, ıaǵnı mýltfılm beınesindegi adam sýrdoaýdarma jasaıdy. Bul bizdiń jumysty jeńildetedi, az ýaqyt ketedi, óıtkeni adamnyń qatysýy kóp ýaqyt alady. Jańa jobany bir aıdyń ishinde efırge shyǵarýdy josparlap otyrmyz, qazir qujattaryn rásimdep jatyrmyz, — deıdi ol.

Sondaı-aq, tele-maman jasandy ıntellektini áleýmettik telejoba salasynda qoldaný tıimdi dep otyr. 

— Degenmen jasandy ıntellektini tek tehnologııalyq qural retinde paıdalaný kerek, óıtkeni adamnyń obrazyn basa almaıdy, adamnyń oıyn jetkize almaıdy. Sondyqtan biz bul tehnologııany adamdy almastyrý úshin emes, jumysty ońtaılandyrý úshin qoldanǵaly jatyrmyz. Odan bólek, bizde 6 tilde aqparat taratatyn halyqaralyq «Silk Way» telearnasy bar jáne ár tildiń óz redaktsııasy jumys istep tur. Sondyqtan mamandardy shetelden shaqyramyz, Ózbekstannan, Qyrǵyzstannan taǵy basqa elderden. Osy jerde bir másele bar, bizge kelip túsken aqparatty 6 tilge aýdarmaı birden bere almaımyz, sebebi aqparat 6 tilde qatar taratylýy kerek, ol úshin kelgen aqparatty aldymen barlyq tilge aýdarý qajet. Sol úshin biz kútip qalamyz, joq degende 2 saǵat ýaqyt alady, demek jyldamdyqty joǵaltamyz. Onyń ústine kóp adam resýrsyn qajet etedi, sondyqtan biz aldaǵy ýaqytta jasandy ıntellektini aýdarma jaǵynan qoldanǵymyz kelip otyr. Búginde «Silk Way» telearnasy Ortalyq Azııanyń daýsy bolyp tur, telearnada Ortalyq Azııaǵa arnalǵan bloktar bar, — dep tolyqtyrdy telearna basshysy.

Eske sala ketsek, 11 aqpan halyqaralyq ǵylymdaǵy áıelder men qyzdar kúni qarsańynda jasandy ıntellektiniń kómegimen ym tilin qazaqshalaý jobasyn qolǵa alǵan astanalyq ǵalym Nurzada Amangeldimen suhbat qurǵan edik. Qazir ǵalym estý, sóıleý qabileti nashar jandarǵa arnalǵan mekemelermen kelisimshart jasap, qazaqsha ym tili jobasy pılottyq rejımde aprobatsııadan ótip jatyr.

Aıta keteıik, Astanada ІІ Ortalyq Azııa medıaforýmy ótip jatyr. Forýmǵa Qazaqstan, Ózbekstan, Qyrǵyzstan, Ázerbaıjan, Tájikstan, Túrikmenstan, Ulybrıtanııa, Qytaı, Qatar, Reseı jáne basqa da elderden 700-den astam delegat qatysyp jatyr. 

Sondaı-aq Silk Way Ortalyq Azııanyń ortaq telearnasyna aınalý múmkindigi týraly jazǵan bolatynbyz. 

Odan bólek, medıaforým barysynda Astanada ekinshi Al Jazeera aptalyǵy ótetini belgili boldy.