Izraıldik fýtbol jankúıerleri men Palestına jaqtastary arasyndaǵy qaqtyǵystan keıin ondaǵan adam qamaýǵa alyndy
ASTANA. KAZINFORM — Nıderland bıligi juma kúni Amsterdamda ızraıldik «Makkabı Tel-Avıv» fýtbol klýbynyń jaqtastary men palestınalyqtardy jaqtaýshylar arasyndaǵy eki kúndik qaqtyǵystardan keıin ondaǵan adam qamaýǵa alyndy dep habarlady, Sınhýa agenttigi.
Sársenbi kúni keshke Amsterdamnyń ortalyǵyndaǵy bir ǵımarattan ızraıldik fýtbol klýbynyń jaqtastary Palestına týyn alyp tastap, palestınalyq sherýshilermen qaqtyǵysty. Beısenbi kúni keshke Eýropa lıgasy aıasyndaǵy «Aıaks» pen Tel-Avıvtiń «Makkabı» kezdesýinde de qaqtyǵystar boldy.
Polıtsııa ızraıldik jankúıerlerdi qorǵaý úshin olardy qonaqúılerge deıin shyǵaryp salǵan. Bul týraly Amsterdam meri men polıtsııa sondaı-aq prokýratýra kúsh birikitirip, máseleni qalaı sheshýge tyrysqandary týraly málimdeme barysynda aıtty.
Tártipsizdik kezinde birneshe adam jaralanyp, 57 adam qamaýǵa alyndy, dep habarlady polıtsııa.
Gollandııalyq BAQ-tyń habarlaýynsha, jergilikti bılik qazirgi jaǵdaıǵa qatty alańdap otyrǵan Izraıl elshiligimen jáne Amsterdamnyń evreı qaýymdastyǵymen tyǵyz baılanysta.
Eske sala keteıik, buǵan deıin Izraıl qorǵanys kúshteri Gollandııa astanasynda «Makkabı Tel-Avıv» fýtbol klýbynyń jankúıerlerine qastandyq jasalǵannan keıin Amsterdamǵa «dereý qutqarý mıssııasyn jiberýge» daıyndalyp jatqanyn málimdegenin jazǵan bolatynbyz.
