Izraıl Sırııa áýejaıyna shabýyl jasady
Izraıl ÁÁK Damask jáne Aleppo halyqaralyq áýejaılaryna kezekti áýe soqqysyn jasady. Saldarynan eki adam zardap shegip, áýe aılaǵy isten shyqty. Kazinform bul týraly Sırııanyń SANA aqparat agenttigine silteme jasap habarlaıdy.
Búgin tańda jasalǵan shabýyldan Damas áýejaıynyń bir qyzmetkeri qaza taýyp, taǵy biri jaraqat aldy. Marqum áýejaıdyń meteorologııa departamentiniń qyzmetkeri bolatyn.
«Shamamen 05:25 kezinde ızraıldik qarsylas bir ýaqytta Jerorta teńizinen batysqa qaraı Latakııadan jáne basyp alynǵan sırııalyq Golan jaqtan Damask jáne Aleppo halyqaralyq áýejaılaryna soqqy jasady», - dep jazdy agenttik.
Izraıldik avıatsııa shabýyly saldarynan eki áýejaıdyń da ushý-qoný jolaǵyna zaqym kelip, isten shyqty. Sırııa kólik mınıstrligi Damask jáne Aleppo áýejaılaryndaǵy turaqty reısterdiń bári halyqaralyq Latakııa áýejaıyna aýystyrylatynyn málim etti.
Keıingi aptada Izraıl áskeri eki áýe aılaǵyn isten shyǵarý úshin birneshe ret shabýyl jasady.
Keıingi jyldary Izraıl Sırııanyń úkimet baqylaýyndaǵy aýdandaryna júzdegen áýe soqqysyn jasady. Soǵan qaramastan Izraıl bıligi Sırııa nysandaryna shabýyl jasaǵanyn kópshilik aldynda moıyndaýy sırek. Olar mundaı operatsııalar Iran qarýy Tegeran qoldaıtyn qarýly toptardyń qolyna túspes úshin uıymdastyrylady dep aqtalady.
