Izraıl shabýyly kezinde Iran prezıdenti zardap shekti
ASTANA. KAZINFORM — Irandyq aqparat quraldarynyń habarlaýynsha, el prezıdenti Masýd Pezeshkıan Izraıldiń áýe shabýyly saldarynan qaza taba jazdady, dep habarlaıdy BILD.
Fars agenttiginiń málimetinshe, soǵys bastalǵannan úsh kún ótken soń, 16 maýsym kúni Izraıl áskerı-áýe kúshteri Irannyń Ulttyq qaýipsizdik jónindegi Joǵarǵy keńesimen baılanysty nysanǵa áýe soqqysyn jasaǵan.
Bombalaýdan keıin ǵımarattaǵy elektr jaryǵy óship, sol sátte jınalys ótkizip jatqan adamdar, onyń ishinde Prezıdent Pezeshkıan da shuǵyl túrde evakýatsııalanǵan. Birneshe adam, sonyń ishinde Iran prezıdenti de aıaqtan jaraqat alǵan.
Pezeshkıannyń ózi bul oqıǵany ırandyq arnaıy qyzmetterden aqparattyń syrtqa shyǵýymen baılanystyrýy múmkin ekenin aıtqan. Fars agenttigi shabýylǵa qatysty Iran ishinde «jiberilgen agent» nusqasy da talqylanyp jatqanyn habarlady.
Irandyq BAQ-ta shabýyldan keıingi kórinis beınelengen vıdeo jarııalandy. Kadrlarda Tegerannyń batys bóligindegi taý baýraıyna jasalǵan soqqylar kórsetilgen — dál sol jerde shabýylǵa ushyraǵan keshen ornalasqan. Izraıl tarapy bul oqıǵaǵa qatysty ázirge resmı málimdeme jasaǵan joq.
Aıta ketelik Iran MAGATE-men jańa formatta yntymaqtastyq ornatýǵa daıyn ekenin jazǵan edik.